Christmasને માટે ઘરે બનાવો બજાર જેવી પરફેક્ટ ચોકલેટ મગ કેક

• પાર્ટી માટે પ્લાન કરો મગ કેક
  
• બાળકોથી માંડીને મોટેરાંઓને પડશે મજા
• ચોકલેટ મગ કેક બનશે બેસ્ટ ઓપ્શન

ક્રિસમસનો તહેવાર નજીકમાં છે ત્યારે અનેક ઘરમાં લોકો પાર્ટીનો પ્લાન કરે છે. ક્રિસમસમાં ખાસ કરીને કેક કાપવાનો રિવાજ છે. જો તમે પણ આ દિવસે તમારા ઘરે પાર્ટી પ્લાન કરી રહ્યા છો તો તમે બજારમાંથી કેક લાવવાના બદલે ઘરે જ સરળતાથી કપ કેક કે મગ કેક તૈયાર કરી શકો છો. આજે આપણે ચોકલેટ ફ્લેવરની મદદથી તેને તૈયાર કરીશું. આ ફ્લેવરની કેક નાના બાળકોથી માંડીને મોટાંઓને પણ પસંદ હોય છે. તો જાણો પરફેક્ટ માપની સરળ રેસિપિ અને ફટાફટ કરી લો પાર્ટીનો પ્લાન.

ચોકલેટ મગ કેક

સામગ્રી

-4 ટેબલસ્પૂન મેંદો

-5 ટેબલસ્પૂન ખાંડ

-2 ટેબલસ્પૂન કોકો પાવડર

-1 ટીસ્પૂન બેકિંગ પાવડર

-1 નંગ ઈંડુ

-3 ટેબલસ્પૂન દૂધ

-3 ટેબલસ્પૂન બટર

-1 ચપટી મીઠું

-2 ટીપાં વેનિલા એસેન્સ

રીત

સૌપ્રથમ બે માઈક્રોવેવ મગ લઈ લો. જે 250 મીલીના હોય. એના કરતા નાના લેશો તો કેક ફૂલીને બહાર નીકળી જશે. હવે એક મિક્સિંગ બાઉલમાં મેંદો, કોકો પાવડર, બેકિંગ પાવડર, મીઠું અને દળેલી ખાંડ બરાબર ચાળી લો. ત્યાર બાદ તેને બંને મગમાં અડધા અડધા પ્રમાણમાં ઉમેરી દો. ચમચીથી બરાબર મિક્સ કરી લો. હવે એ જ ખાલી થયેલા મિક્સિંગ બાઉલમાં દૂધ, બટર અને વેનિલા એસેન્સ ઉમેરીને બરાબર મિક્સ કરી લો. ત્યાર બાદ તેમાં ઈંડુ ઉમેરીને બરાબર મિક્સ કરી લો. ચમચીથી બરાબર ફેંટી લો. હવે આ મિશ્રણને પણ બંને મગમાં અડધું-અડધું ઉમેરી દો. હવે બંને મગમાંના મિશ્રણને ચમચીની મદદથી બરાબર ફેંટી લો. એકદમ સ્મૂધ પેસ્ટ બનાવી લો. એ વાતનું ખાસ ધ્યાન રાખવું કે, લોટ તળિયે ચોંટેલો ના હોવો જોઈએ. લોટના ગઠ્ઠા ના રહે એ રીતે બરાબર ફેંટો. એક સમયે એક જ મગ માઈક્રોવેવમાં મૂકીને બેક કરી લો. મધ્યમ તાપે બે મિનિટ માટે બેક કરો. ત્યાર બાદ ટૂથપીક નાંખીને ચેક કરી લો કે, કેક તૈયાર થઈ ગઈ છે કે નહીં. જો થઈ ગઈ હોય તો કાઢીને બીજો મગ મૂકી દો. તૈયાર છે પાંચ મિનિટમાં તૈયાર થતી મગ કેક.