શિયાળામાં તલની મદદથી બનાવો ખાસ વસ્તુ, ઠંડી સામે મળશે રાહત

• તલનું સેવન શિયાળામાં રહેશે ફાયદારૂપ
  
• બજારના ગજક ખરીદવાને બદલે બનાવો સરળ રીતે ઘરે
• પરફેક્ટ માપ સાથે બનાવેલા ગજક હેલ્થ માટે રહેશે બેસ્ટ

શિયાળાની સીઝનમાં અનેક એવી ચીજો છે જે શરીરને ગરમ રાખવામાં મદદ કરે છે. તમારે આ ચીજોને ડેઈલી ડાયટમાં સામેલ કરી લેવી જોઈએ જેથી બીમાર થવાની શક્યતાઓ ઘટાડી શકાય. તલનું સેવન શિયાળામાં ફાયદારૂપ માનવામાં આવે છે. તે શરીરને ગરમ રાખવામાં મદદ કરે છે. બજારમાં ગજક સરળતાથી મળી રહ્યા છે પણ જો તમે તેને ઘરે બનાવવા ઈચ્છો છો તો તમે સરળતાથી હેલ્ધી અને ટેસ્ટી ગજક તૈયાર કરી શકો છો. તો જાણો કેવી રીતે પરફેક્ટ માપ સાથે તેને ફટાફટ બનાવી શકાશે.

તલના ગજક

સામગ્રી

- એક કપ તલ

- પોણો કપ ગોળ

- બે ટીસ્પૂન ઘી

- અડધી ટીસ્પૂન એલચી પાઉડર

- અડધો કપ પાણી

- પા કપ પિસ્તાની કતરણ

રીત

એક પેન લો અને તેમાં તલને ધીમા તાપે શેકી લો. તલ શેકતા ગેસ ધીમો રાખો. જેથી તે સારી રીતે શેકાઈ જાય. તલ સોનેરી થાય તો તેને પેનમાંથી પ્લેટમાં કાઢીને ઠંડા કરો. હવે તલ સહેજ ઠંડા થાય એટલે તેનો ખાંડીને ભૂકો કરી લો. હવે ગોળમાં અડધો કપ પાણી નાંખી તેની ઘટ્ટ ચાસણી બનાવી લો. ચાસણી તૈયાર થઈ જાય એટલે તેમાં શેકેલા અને ખાંડેલા તલ અને એલચીનો ભૂકો નાંખી મિક્સ કરી લો. ત્યારબાદ એક પ્લેટમાં સહેજ ઘી લગાવી તેના ઉપર આ મિશ્રણ પાથરી દો. સહેજ ઠંડું થાય એટલે તેના ચોરસ કટકા કરી સર્વ કરો. હવે તેની પર પિસ્તાની કતરણ પાથરી દો. તૈયાર છે તમારો ગજક.