Summer Season: ગરમીમાં કાચી કેરીનો આ જ્યુસ આપશે હેલ્થને અનેક ફાયદા,જાણો રેસિપિ

• ગેસની સમસ્યાઓથી મળશે રાહત
  
• ઓછી વસ્તુઓથી ઘરે બનાવી શકાશે શરબત
• ગરમીમાં કેરીનો પન્નો રહેશે બેસ્ટ

ઉનાળામાં તડકા અને ગરમીથી બચવા માટે લોકો પોતાના આહારમાં ઘણી વસ્તુઓનો સમાવેશ કરે છે. જે પેટની ગરમીને દૂર કરે છે અને શરીરને ઠંડક પ્રદાન કરે છે. આવા જ એક ઉનાળાના પીણાનું નામ છે આમ પન્ના, જેને આપણે કેરીનો પન્નો કહીએ છીએ. વયસ્કો હોય કે બાળકો, દરેક વયજૂથના લોકોને તેનો સ્વાદ ગમે છે. ઉનાળામાં આ પીણું ગેસ્ટ્રો સમસ્યાને દૂર કરે છે અને શરીરને તાજગી અનુભવે છે. એટલું જ નહીં આ સમર સ્પેશિયલ રેસિપી પણ ખૂબ જ ઓછા સમયમાં તૈયાર કરી શકાય છે. તો જાણો કેવી રીતે ફટાફટ કરી શકશો તૈયાર.

કેરીનો પન્નો બનાવવા માટેની સામગ્રી

- 4 કાચી કેરી

- 2 ચમચી શેકેલું જીરું પાવડર

- 6 ચમચી ગોળ અથવા ખાંડ

- 3 ચમચી કાળું મીઠું

- 1 ચમચી ફુદીનાના પાન

- મીઠું સ્વાદ મુજબ

બનાવવાની રીત

સૌ પહેલા કેરીને સારી રીતે ધોઈને સાફ કરી લો. હવે તેને છોલી લો અને તેના નાના ટુકડા કરી લો. હવે તમે ઈચ્છો તો તેને કૂકરમાં 2 સીટી આવે ત્યાં સુધી રાખો અને પછી ગેસ બંધ કરી લો. તમે ઈચછો તો તેને 10 મિનિટ સુધી તપેલીમાં પાણી નાંખીને કેરી ઉમેરીને પણ ઉકાળી શકો છો. હવે મિશ્રણને ઠંડું થવા દો. પાણીમાંથી કેરી અલગ કરો અને બધી વસ્તુઓ તેમાં મિક્સ કરો. બધી વસ્તુઓ મિક્સ કરી લીધા બાદ તેને બ્લેન્ડરની મદદથી કે મિક્સરની મદદથી સારી રીતે ક્રશ કરો. હવે તેમાં ઉકાળેલું અને વધેલું પાણી મિક્સ કરો અને ફરીથી ક્રશ કરો. આ પછી જ્યુસને ગળણી કે કોટન કપડાંની મદદથી ગાળી લો, આ મિશ્રણને એક બોટલમાં ભરીને ફ્રિઝમાં ઠંડું કરવા રાખો. જ્યારે તમને ઠંડું પીવાની ઈચ્છા થાય ત્યારે તમે તેમાં બરફના ટુકડા ઉમેરીને તેને પીઓ. મહેમાન આવે તો પણ આ બેસ્ટ સર્વિંગ ડ્રિંક બની શકે છે.