તાજેતરમાં ૨૩ જૂનના રોજ, બોલીવુડના દિગ્ગજ ગાયિકા અલકા યાજ્ઞિકને સંગીત ક્ષેત્રે તેમના અપ્રતિમ યોગદાન બદલ ભારત સરકાર દ્વારા ત્રીજા સર્વોચ્ચ નાગરિક પુરસ્કાર 'પદ્મ ભૂષણ' થી સન્માનિત કરવામાં આવ્યા હતા. એવોર્ડ સમારોહ દરમિયાનનો 60 વર્ષીય ગાયિકાનો એક વીડિયો સોશિયલ મીડિયા પર વાયરલ થયો છે, જેમાં તેઓ ચાલવા માટે એક સહાયકની મદદ લેતા જોવા મળ્યા હતા. આ દ્રશ્યે તેમના અસંખ્ય ચાહકોને ચિંતામાં મૂકી દીધા છે. આ ખાસ અવસર પર તેમણે સોશિયલ મીડિયા પર એક અત્યંત ભાવનાત્મક નોંધ શેર કરી હતી, જેમાં તેમણે પુરસ્કાર માટે કૃતજ્ઞતા વ્યક્ત કરવાની સાથે પોતાની નાદુરસ્ત તબિયત વિશે પણ વાત કરી હતી.
દુર્લભ બીમારીથી પીડિત અલકા યાજ્ઞિક
ઉલ્લેખનીય છે કે, વર્ષ ૨૦૨૪ માં તેમણે પોતે એક દુર્લભ બીમારીથી પીડિત હોવાનો ખુલાસો કર્યો હતો, જેના કારણે તેઓ છેલ્લા કેટલાક સમયથી લાઈમલાઈટથી દૂર છે. તમને જણાવી દઈએ કે ફેમસ ગાયિકા અલકા યાજ્ઞિક 'સેન્સોરિન્યુરલ નર્વ હિયરિંગ લોસ' (Sensorineural Nerve Hearing Loss) નામની એક દુર્લભ અને ગંભીર શ્રવણ વિકૃતિનો સામનો કરી રહ્યા છે. મીડિયા રિપોર્ટ્સ અનુસાર, અચાનક થયેલા વાયરલ ઇન્ફેક્શનના (વાયરલ એટેક) કારણે તેમને આ સમસ્યા થઈ હતી. ગાયિકાએ આ સ્થિતિને તેમના જીવનનો સૌથી મોટો આંચકો ગણાવ્યો હતો અને ચાહકોને તેમના સ્વાસ્થ્ય માટે પ્રાર્થના કરવા અપીલ કરી હતી. તેઓ હજુ સુધી આ સ્થિતિમાંથી સંપૂર્ણપણે સ્વસ્થ થઈ શક્યા નથી.
