હિમાચલ પ્રદેશનું પાટનગર શિમલા માત્ર તેના બરફથી ઢંકાયેલા પહાડો, સુંદર ખીણો અને મોહક નજારાઓ માટે જ જાણીતું નથી, પરંતુ તે સંસ્કૃતિથી ભરપૂર પરંપરાગત વાનગીઓ માટે પણ દેશભરમાં મશહૂર છે. જો તમે પણ જૂન મહિનાના આ સુહાના વાતાવરણમાં કે આગામી સમયમાં શિમલા જવાનું વિચારી રહ્યા હોવ, તો ત્યાંના સ્થાનિક સ્વાદની મજા લેવાનું બિલકુલ ચૂકતા નહીં. પહાડી ભોજનનો ચટાકો તમારી આ યાત્રાને વધુ રસપ્રદ અને કાયમ માટે યાદગાર બનાવી દેશે.
શિમલાની સૌથી લોકપ્રિય સ્થાનિક વાનગીઓ
શિમલાની સૌથી લોકપ્રિય સ્થાનિક વાનગીઓમાં 'સિડ્ડુ' (Siddu) મોખરે છે. ઘઉંના લોટમાંથી બનતી આ એક ખાસ પ્રકારની સ્ટીમ્ડ બ્રેડ છે, જેને લોટમાં આથો આવ્યા બાદ તૈયાર કરવામાં આવે છે. ગરમાગરમ સિડ્ડુને સામાન્ય રીતે દેશી ઘી, દાળ અથવા તીખી ચટણી સાથે પીરસવામાં આવે છે અને તેનો સ્વાદ લાજવાબ હોય છે. આ સિવાય ચંબા વિસ્તારની ફેમસ ડિશ 'મદરા' (Madra) પણ અચૂક ટ્રાય કરવા જેવી છે. દહીંની ઘટ્ટ ગ્રેવીમાં ચણા અથવા શાકભાજી ઉમેરીને બનાવાતી આ વાનગી તેના ખાસ મસાલાઓને કારણે અલગ જ સ્વાદ આપે છે.
