લોકશાહીના સૌથી મોટા પર્વ સમાન ચૂંટણીના મતદાન બાદ અનેક જગ્યાએ રાજકીય ગરમાવો અને સંઘર્ષ જોવા મળતો હોય છે, ત્યારે દેવભૂમિ દ્વારકા જિલ્લાના લાંબા ગામે સામાજિક સમરસતાનું ઉત્તમ ઉદાહરણ પૂરું પાડ્યું છે. અહીં ચૂંટણી પૂર્ણ થતાની સાથે જ રાજકીય સ્પર્ધાને બાજુ પર મૂકી ભાજપ, કોંગ્રેસ અને આમ આદમી પાર્ટીના ઉમેદવારો તેમજ કાર્યકરો એકતાના રંગે રંગાયેલા જોવા મળ્યા હતા.
ચાની ચુસ્કી સાથે રાજકીય ખટરાગનો અંત
સામાન્ય રીતે ચૂંટણી દરમિયાન વિવિધ વિચારધારાઓ વચ્ચે ખેંચતાણ અને નિવેદનબાજી જોવા મળતી હોય છે, પરંતુ લાંબા ગામની આ બેઠક પર દ્રશ્યો કંઇક અલગ જ હતા. મતદાન પ્રક્રિયા પૂર્ણ થયા બાદ તમામ પક્ષના કાર્યકરો અને ઉમેદવારોએ એકસાથે બેસીને ચાની ચુસ્કી લીધી હતી અને હળવાશની પળો માણી હતી. "મતદાન પૂરું અને મનભેદ પૂરા"ના સૂત્રને અહીંના લોકોએ સાર્થક કરી બતાવ્યું છે.
