ગુજરાતના રાજકારણમાં વડોદરા જિલ્લાના ભાજપના પાંચ ધારાસભ્યોએ એકસાથે મળીને વહીવટી તંત્ર સામે જે રીતે બ્યૂગલ ફૂંક્યું છે, તેણે સચિવાલયથી લઈને સ્થાનિક તંત્ર સુધી ખળભળાટ મચાવી દીધો છે. ધારાસભ્ય કેતન ઇનામદાર, શૈલેષ મહેતા, ચૈતન્ય ઝાલા, અક્ષય પટેલ અને ધર્મેન્દ્રસિંહ વાઘેલાએ સંયુક્ત હસ્તાક્ષર સાથે મુખ્યમંત્રીને પત્ર લખીને જિલ્લાના ઉચ્ચ અધિકારીઓની કાર્યશૈલી પર સવાલિયા નિશાન ઊભા કર્યા છે.
અધિકારીઓનો 'કાચના મહેલ'માં વહીવટ
ધારાસભ્યોનો સૌથી મોટો આક્ષેપ એ છે કે જિલ્લા કલેક્ટર, DDO અને પોલીસ કમિશનર જેવા ઉચ્ચ હોદ્દા પર બેઠેલા અધિકારીઓ માત્ર એરકન્ડિશન્ડ ઓફિસોમાં બેસીને વીડિયો કોન્ફરન્સ દ્વારા વહીવટ ચલાવે છે. જમીની હકીકત અને પ્રજાની મુશ્કેલીઓથી તેઓ ખૂબ દૂર છે. પત્રમાં સ્પષ્ટ જણાવાયું છે કે, અધિકારીઓ સરકાર સમક્ષ સત્ય રજૂ કરવાને બદલે 'બધું જ બરાબર છે' તેવું ખોટું અને ગુલાબી ચિત્ર રજૂ કરી સરકારને ગેરમાર્ગે દોરી રહ્યા છે.જ્યારે જનપ્રતિનિધિઓ પ્રજાના પ્રશ્નો લઈને જાય છે ત્યારે અધિકારીઓ તેમની વાત સાંભળવાની તસ્દી પણ લેતા નથી. પત્રમાં આરોપ છે કે કેટલાક અધિકારીઓ તો "પોતે જ સરકાર છે" તેવા અહંકારમાં રાચે છે. જો કોઈ નાગરિક ધારાસભ્યની મદદ લે તો અધિકારીઓ તે નાગરિકને પજવણી કરે છે અને પૂછે છે કે "તમે ધારાસભ્ય પાસે કેમ ગયા?".આ પ્રકારની માનસિકતા લોકશાહીના પાયા પર ઘા સમાન છે.
