શુભમને તોડ્યો કોહલી-ધવનનો રેકોર્ડ, ODIમાં બન્યો ભારતનો સુપરમેન

• પ્રથમ 20 ODIમાં સૌથી વધુ રન બનાવનાર ભારતીય બન્યો
  
• અત્યાર સુધી 18 ઇનિંગ્સમાં 59.6ની એવરેજ 894 રન બનાવ્યા
• શ્રેયસ-ધવન-સિદ્ધુ-કોહલીને પાછળ છોડી દીધા

શુભમન ગિલ ભારત માટે અત્યાર સુધીમાં 18 ODI રમી ચૂક્યો છે અને તેણે અત્યાર સુધીમાં 894 રન બનાવ્યા છે. શુભમન ભારત તરફથી પ્રથમ 20 ODIમાં સૌથી વધુ રન બનાવનાર બેટ્સમેન બની ગયો છે.

ગિલે ઘણા રેકોર્ડ પોતાના નામે કર્યા

તિરુવનંતપુરમમાં રમાયેલી ત્રીજી ODIમાં ભારતે શ્રીલંકાને 317 રનથી હરાવ્યું હતું. આ જીત સાથે ટીમ ઈન્ડિયાએ ત્રણ મેચની ODI શ્રેણી પણ 3-0થી જીતી લીધી છે. શુભમન ગિલ અને વિરાટ કોહલીએ ત્રીજી ODIમાં શાનદાર સદી ફટકારી હતી. ગિલે 97 બોલમાં 116 રનની ઇનિંગ રમી હતી. આ તેની ODI કારકિર્દીની બીજી સદી અને આંતરરાષ્ટ્રીય કારકિર્દીની ત્રીજી સદી હતી. આ સદીની સાથે ગિલે ઘણા રેકોર્ડ પણ પોતાના નામે કર્યા.

18 ODIમાં 894 રન બનાવ્યા

શુભમન ગિલ ભારત માટે અત્યાર સુધીમાં 18 ODI રમી ચૂક્યો છે અને તેણે અત્યાર સુધીમાં 894 રન બનાવ્યા છે. શુભમન ભારત તરફથી પ્રથમ 20 ODIમાં સૌથી વધુ રન બનાવનાર બેટ્સમેન બની ગયો છે. તેણે હજુ સુધી 20 ODI રમી નથી, પરંતુ તેની 18મી ODIમાં જ 20 ODI રમી ચૂકેલા અન્ય ભારતીય બેટ્સમેનોના રનનો રેકોર્ડ તોડ્યો છે. આ મામલામાં તેણે શ્રેયસ અય્યર, શિખર ધવન, નવજોત સિંહ સિદ્ધુ અને વિરાટ કોહલી જેવા સ્ટાર ખેલાડીઓને પાછળ છોડી દીધા છે. શુભમને 18 મેચમાં 18 ઈનિંગ્સ રમી છે, જ્યારે ધવન સિવાય બધાએ 20 મેચમાં 18 ઈનિંગ્સ રમી છે. એટલે કે તેને બેમાંથી એક પણ ઇનિંગમાં બેટિંગ કરવાની તક મળી ન હતી. જ્યારે ઓપનર હોવાને કારણે, ધવને 20 મેચમાં બેટિંગ કરી હતી.

બે સદી-પાંચ અડધી સદી ફટકારી

શુભમને ODIની 18 ઇનિંગ્સમાં 59.6ની એવરેજ અને 103.7ની શાનદાર સ્ટ્રાઇક રેટથી 894 રન બનાવ્યા છે. જેમાં બે સદી અને પાંચ અડધી સદીનો સમાવેશ થાય છે. આ પહેલા આ રેકોર્ડ શ્રેયસના નામે હતો. તેણે તેની પ્રથમ 20 ODIની 18 ઇનિંગ્સમાં 46.35ની સરેરાશ અને 101ના સ્ટ્રાઇક રેટથી 788 રન બનાવ્યા હતા. ધવન આ યાદીમાં ત્રીજા નંબર પર છે. તેણે પ્રથમ 20 ODIની 20 ઇનિંગ્સમાં 41.21ની એવરેજ અને 87.6ની સ્ટ્રાઇક રેટથી 783 રન બનાવ્યા હતા.

લેજેન્ડ ખેલાડીઓને પાછળ છોડ્યા

નવજોત સિદ્ધુએ પ્રથમ 18 ઇનિંગ્સમાં 44.71ની એવરેજ અને 73ના સ્ટ્રાઇક રેટથી 760 રન બનાવ્યા હતા. કોહલીએ પ્રથમ 20 મેચની 18 ઇનિંગ્સમાં 54.21ની એવરેજ અને 83.5ના સ્ટ્રાઇક રેટથી 759 રન બનાવ્યા હતા. શુભમને આ બધાને પાછળ છોડી દીધા છે, જ્યારે તેની 20 મેચોમાં હજુ બે મેચ બાકી છે. શુભમને પોતાની ઇનિંગમાં 14 ચોગ્ગા અને બે છગ્ગા ફટકાર્યા હતા. શ્રીલંકા સામેની ત્રણ મેચની ODI શ્રેણીમાં શુભમને 69ની એવરેજથી 207 રન બનાવ્યા હતા. પ્રથમ ODIમાં શુભમને 70 રનની ઇનિંગ રમી હતી.

શ્રીલંકા સામે અંતિમ ODIમાં દમદાર સદી

ત્રીજી ODIની વાત કરીએ તો, પ્રથમ બેટિંગ કરતા ભારતે 50 ઓવરમાં પાંચ વિકેટ ગુમાવીને 390 રન બનાવ્યા હતા. શુભમન ગિલે 116 રન અને વિરાટ કોહલીએ 166 રનની અણનમ ઇનિંગ રમી હતી. જવાબમાં શ્રીલંકાની ટીમે 22 ઓવરમાં નવ વિકેટ ગુમાવીને 73 રન બનાવ્યા હતા. એશેન બંદારા ઈજાના કારણે મેદાન પર આવી શક્યો ન હતો. આ રીતે ટીમ ઈન્ડિયા 317 રનથી જીતી ગઈ. ODI ઈતિહાસમાં રનના માર્જિનથી આ સૌથી મોટી જીત છે. આ પહેલા આ રેકોર્ડ ન્યુઝીલેન્ડના નામે હતો. તેઓએ 2008માં આયર્લેન્ડને 290 રનથી હરાવ્યું હતું. જ્યારે ભારતીય ટીમનો અગાઉનો રેકોર્ડ 257 રનની જીતનો હતો, જે તેણે 2007માં બર્મુડા સામે હાંસલ કર્યો હતો.