- T20 વર્લ્ડકપ 2024ની 1 જૂનથી શરૂઆત થશે
- એપ્રિલના અંતમાં ટીમ ઈન્ડિયાની જાહેરાત થશે
- ભારતની પ્રથમ મેચ 5 જૂને આયર્લેન્ડ સામે રમાશે
T20 વર્લ્ડકપ 2024 1 જૂનથી શરૂ થશે. ભારતીય ટીમ 5 જૂને ટૂર્નામેન્ટમાં પોતાના અભિયાનની શરૂઆત કરશે. પ્રથમ મેચમાં ભારતીય ટીમ આયર્લેન્ડ સામે ટકરાશે. બીજી મેચમાં ટીમ ઈન્ડિયાનો મુકાબલો પાકિસ્તાન સામે થશે. આ શાનદાર મેચ ન્યૂયોર્કના નાસાઉ કાઉન્ટી ઈન્ટરનેશનલ ક્રિકેટ સ્ટેડિયમમાં રમાશે. ટુર્નામેન્ટ માટે ભારતીય ટીમની હજુ સુધી જાહેરાત કરવામાં આવી નથી. ભારતીય ટીમની પસંદગી માટે પસંદગીકારો ટૂંક સમયમાં એક બેઠક યોજવાના છે.
ભારતીય ટીમે 2007માં આ ખિતાબ જીત્યો
ભારતીય ટીમે પ્રથમ વખત 2007માં T20 વર્લ્ડકપ રમ્યો હતો. તે વિજેતા ટીમનો ભાગ રહેલા મોટાભાગના ખેલાડીઓ હવે નિવૃત્ત થઈ ગયા છે. જો કે, 3 ખેલાડીઓ એવા પણ છે જે IPL અને આંતરરાષ્ટ્રીય ક્રિકેટમાં સક્રિય છે. તેમાંથી 2 ખેલાડીઓ T20 વર્લ્ડકપ 2024 માટે પસંદ કરાયેલી ભારતીય ટીમમાં જગ્યા બનાવી શકે છે. ભારતીય ટીમના કેપ્ટન રોહિત શર્મા ઉપરાંત આ 3 ખેલાડીઓમાં વિકેટકીપર બેટ્સમેન દિનેશ કાર્તિક અને સ્પિનર પીયૂષ ચાવલાનો સમાવેશ થાય છે.
રોહિત અને કાર્તિક શાનદાર ફોર્મમાં
રોહિત શર્મા T20 વર્લ્ડકપમાં ભારતીય ટીમનું નેતૃત્વ કરતો જોવા મળશે. તેણે IPL 2024માં પણ ઘણી મહત્વપૂર્ણ ઇનિંગ્સ રમી છે. રોહિતે અત્યાર સુધી 7 મેચમાં 50ની આસપાસની એવરેજથી 297 રન બનાવ્યા છે. રોહિત ઉપરાંત વિકેટકીપર બેટ્સમેન દિનેશ કાર્તિક પણ IPLની 17મી સિઝનમાં શાનદાર બેટિંગ કરી રહ્યો છે. તેણે 7 મેચની 6 ઇનિંગ્સમાં 75.33ની એવરેજ અને 205.45ની સ્ટ્રાઇક રેટથી 226 રન બનાવ્યા છે. આ દરમિયાન તેણે 2 ફિફ્ટી પણ ફટકારી છે. તેને વર્લ્ડકપ 2024 માટે ભારતીય ટીમમાં તક મળી શકે છે.
