- T20 વર્લ્ડકપ 2024 1 જૂનથી શરૂ થશે
- ટૂર્નામેન્ટ યુએસ અને વેસ્ટ ઈન્ડિઝમાં યોજાશે
- 28 એપ્રિલે થઈ શકે ટીમ ઈન્ડિયાની જાહેરાત
IPL 2024ની મેચો ચાલી રહી છે પરંતુ તેની સાથે T20 વર્લ્ડકપ 2024નું કાઉન્ટડાઉન પણ શરૂ થઈ ગયું છે. આ માટે ટૂંક સમયમાં જ ટીમ ઈન્ડિયાની જાહેરાત થવા જઈ રહી છે. મીડિયા રિપોર્ટ્સને અનુસાર, T20 વર્લ્ડકપ માટે ટીમ ઈન્ડિયાની પસંદગી 27 અથવા 28 એપ્રિલે થઈ શકે છે. સમાચાર છે કે આ બેમાંથી એક તારીખે કેપ્ટન રોહિત શર્મા અને ભારતીય પસંદગીકારો બેસીને ટીમ ઈન્ડિયાની પસંદગી કરશે. T20 વર્લ્ડકપ માટે ટીમની જાહેરાત કરવાની છેલ્લી તારીખ 1 મે છે.
આ તારીખે થશે ટીમની જાહેરાત
ટીમ ઈન્ડિયાની પસંદગી માટે 27મી એપ્રિલ અથવા 28મી એપ્રિલને નિશ્ચિત તારીખ માનવામાં આવી રહી છે કારણ કે તે તારીખે કેપ્ટન રોહિત શર્મા પણ દિલ્હીમાં હશે. IPL 2024ના શેડ્યૂલ મુજબ મુંબઈ ઈન્ડિયન્સની મેચ 27 એપ્રિલે દિલ્હીમાં છે. આવી સ્થિતિમાં ભારતીય પસંદગીકારો સાથેની તેમની બેઠક અને ટીમની પસંદગી બંનેને આખરી ઓપ આપવામાં આવશે.
BCCIના ચીફ સિલેક્ટર અજીત અગરકર પણ સ્પેનથી રજાઓ બાદ આ સિલેક્શન મીટિંગ માટે ભારત પરત ફર્યા છે. 30 એપ્રિલે લખનૌ સુપર જાયન્ટ્સ સાથે મુંબઈ ઈન્ડિયન્સની મેચને ધ્યાનમાં રાખીને 27 અથવા 28 એપ્રિલની તારીખ ટીમની પસંદગી માટે યોગ્ય માનવામાં આવી રહી છે. કારણ કે આ દરમિયાન ભારતીય કેપ્ટનની સાથે પસંદગીકારો પણ દિલ્હીમાં હશે.
હાર્દિક પંડ્યાને લઈને સસ્પેન્સ
હવે સવાલ એ છે કે T20 વર્લ્ડકપ માટે ટીમ ઈન્ડિયામાં કયા ખેલાડીઓની પસંદગી થઈ શકે છે? ઓછામાં ઓછા 10 ખેલાડીઓના નામ નક્કી થઈ ગયા છે, જેમને પસંદ કરી શકાય છે. આ 10 ખેલાડીઓમાં રોહિત શર્મા, વિરાટ કોહલી, સૂર્યકુમાર યાદવ, રિષભ પંત, રવિન્દ્ર જાડેજા, શુભમન ગિલ, કેએલ રાહુલ, કુલદીપ યાદવ, જસપ્રિત બુમરાહ અને મોહમ્મદ સિરાજના નામ છે. હાર્દિક પંડ્યા પ્રથમ 10 નામોમાં નથી. એવું કહેવામાં આવી રહ્યું છે કે જો હાર્દિક IPLમાં બોલિંગ કરશે તો જ તેના પર વિચાર કરી શકાય છે.
