- ઓસ્ટ્રેલિયાએ અફઘાનિસ્તાન સાથે સિરીઝ રમવાનો કર્યો ઈન્કાર
- મહિલાઓ અંગે તાલિબાન સરકારના વલણને કારણે સિરીઝ નહીં રમે
- અફઘાનિસ્તાને T20 વર્લ્ડકપ 2024માં ઓસ્ટ્રેલિયાને હરાવ્યું
તાજેતરમાં T20 વર્લ્ડકપનું આયોજન કરવામાં આવ્યું હતું. જ્યાં ટીમ ઈન્ડિયાએ ફાઈનલમાં સાઉથ આફ્રિકાને હરાવીને ટ્રોફી જીતી હતી. આ સાથે ભારતીય ટીમે 17 વર્ષ બાદ T20 વર્લ્ડકપનો ખિતાબ જીત્યો છે. આ દરમિયાન ઓસ્ટ્રેલિયન ટીમ માટે T20 વર્લ્ડકપ કોઈ દુઃસ્વપ્નથી ઓછો રહ્યો નથી.
સુપર 8 રાઉન્ડમાં તે ભારત સામે ખરાબ રીતે હારી એટલું જ નહીં, તેની ટીમ અફઘાનિસ્તાન સામે પણ હારી ગઈ હતી. જેના કારણે તેની સફર સુપર 8થી આગળ વધી શકી નથી. હવે વર્લ્ડકપ પૂરો થયા બાદ ક્રિકેટ ઓસ્ટ્રેલિયાએ મોટો નિર્ણય લીધો છે અને એક દેશ સાથે કોઈપણ પ્રકારની સિરીઝ રમવાનો ઈન્કાર કરી દીધો છે.
ઓસ્ટ્રેલિયન ક્રિકેટની મોટી જાહેરાત
ક્રિકેટ ઓસ્ટ્રેલિયાએ કહ્યું કે મહિલાઓના અધિકારો અંગે તાલિબાન સરકારના વલણને કારણે ઓસ્ટ્રેલિયા અફઘાનિસ્તાન સાથે દ્વિપક્ષીય ક્રિકેટ નહીં રમે. ક્રિકેટ ઓસ્ટ્રેલિયાના ચીફ એક્ઝિક્યુટિવ નિક હોકલીએ કહ્યું કે આ બાબતે અફઘાનિસ્તાન ક્રિકેટ બોર્ડ સાથે નિયમિત વાતચીત થઈ રહી છે અને આશા છે કે બંને ટીમો ભવિષ્યમાં ક્યારેક એકબીજા સાથે રમવાનું શરૂ કરશે. ઑસ્ટ્રેલિયાએ મહિલાઓના માનવ અધિકારોને ટાંકીને ત્રણ વખત અફઘાનિસ્તાન સાથે દ્વિપક્ષીય સિરીઝ રમવાનું ટાળી દીધું છે, પરંતુ તેઓ ICC ઇવેન્ટ્સમાં તેમની સામે રમી રહ્યા છે.
ક્રિકેટ ઓસ્ટ્રેલિયાના CEO કહીં આ વાત
હોકલીએ કહ્યું કે અફઘાનિસ્તાને મહાન ખેલાડીઓ સાથે એક શાનદાર ટુર્નામેન્ટ રમી અને તેઓ ખૂબ જ ઉત્સાહ અને જુસ્સા સાથે રમ્યા. અમારી દ્વિપક્ષીય મેચોના સંદર્ભમાં, અમે ઓસ્ટ્રેલિયન સરકાર સહિતના હિતધારકો સાથે વ્યાપકપણે પરામર્શ કર્યો છે અને માનવ અધિકારના આધારે અફઘાનિસ્તાન ક્રિકેટ બોર્ડ સાથેની અમારી છેલ્લી કેટલીક સિરીઝને સ્થગિત કરવાનો નિર્ણય લીધો છે.
તેણે કહ્યું કે અમે અફઘાનિસ્તાન ક્રિકેટ બોર્ડ સાથે ગાઢ સંબંધ અને નિયમિત સંવાદ જાળવીએ છીએ અને ઇચ્છીએ છીએ કે ક્રિકેટ પુરૂષ અને મહિલા બંને માટે વિશ્વભરમાં ખીલે. અમે પ્રગતિ માટે આતુર છીએ, અને ભવિષ્યમાં કોઈ સમયે અફઘાનિસ્તાન સાથે દ્વિપક્ષીય ક્રિકેટ ફરી શરૂ કરવાના ઉદ્દેશ્ય સાથે અફઘાનિસ્તાન ક્રિકેટ બોર્ડ સાથે ચર્ચા અને સંપર્ક જાળવી રાખીશું.
