- બાંગ્લાદેશમાં યોજાનાર મહિલા T20 વર્લ્ડકપ 2024 હવે જોખમમાં છે
- બાંગ્લાદેશ ક્રિકેટ બોર્ડના ચીફ નઝમુલ હસન આપશે રાજીનામુ
- ભારતે મહિલા T20 વર્લ્ડકપની યજમાની કરવાનો ઇનકાર કર્યો
બાંગ્લાદેશમાં યોજાનાર મહિલા T20 વર્લ્ડકપ 2024 હવે જોખમમાં છે. આ દિવસોમાં બાંગ્લાદેશમાં આંદોલનો ચાલી રહ્યા છે, શેખ હસીનાએ પીએમ પદ પરથી રાજીનામું આપી દીધું હતું, ત્યારબાદ તેમણે પણ દેશ છોડી દીધો હતો. હાલમાં બાંગ્લાદેશમાં સેનાનું નિયંત્રણ છે. બીજી તરફ, આ વખતે બાંગ્લાદેશને ICC મહિલા T20 વર્લ્ડકપ 2024ની યજમાની પણ મળી છે. ટૂર્નામેન્ટ ઓક્ટોબરમાં શરૂ થવાની છે પરંતુ બાંગ્લાદેશ ક્રિકેટ બોર્ડ હવે વર્લ્ડકપના આયોજનને લઈને ઘણા પડકારોનો સામનો કરી રહ્યું છે.
BCB પ્રમુખ તેમનું પદ છોડશે
એક અહેવાલ મુજબ બાંગ્લાદેશ ક્રિકેટ બોર્ડના એક ડિરેક્ટરે કહ્યું, “BCB ચીફ નઝમુલ હસન હાલમાં ફરાર છે પરંતુ અમે તેના સંપર્કમાં છીએ. નઝમુલ હસન સહકાર આપવા તૈયાર છે અને બોર્ડમાં સુધારા લાવવા માટે ચેરમેન પદેથી રાજીનામું આપવા પણ તૈયાર છે.
BCBને લાંબા સમય બાદ મળ્યો મોકો
બાંગ્લાદેશ ક્રિકેટ બોર્ડ લાંબા સમયથી આ મોટા ઈવેન્ટની તૈયારી કરી રહ્યું હતું, પરંતુ અચાનક દેશની બગડતી પરિસ્થિતિને જોતા હવે બાંગ્લાદેશમાં મહિલા T20 વર્લ્ડકપનું આયોજન કરવું ખૂબ જ મુશ્કેલ માનવામાં આવી રહ્યું છે. BCBએ અત્યાર સુધી કહ્યું છે કે તેણે વચગાળાની સરકારનો સંપર્ક કરીને આ મોટી ઈવેન્ટનું આયોજન કરવા માટે સુરક્ષાની ખાતરી માંગી છે.
ભારતે વર્લ્ડકપની યજમાની કરવાનો ઇનકાર કર્યો
બાંગ્લાદેશમાં બગડતી પરિસ્થિતિને જોતા ICC આ ટૂર્નામેન્ટ ભારત, શ્રીલંકા અથવા UAEમાં યોજવાનું વિચારી રહી છે. પરંતુ ગઈ કાલે BCCI સેક્રેટરીએ કહ્યું હતું કે ભારત મહિલા T20 વર્લ્ડકપ 2024ની યજમાની નહીં કરે. હવે ICC પાસે શ્રીલંકા અને UAEના રૂપમાં 2 વિકલ્પ બચ્યા છે. બીજી તરફ બાંગ્લાદેશ ક્રિકેટ બોર્ડ પોતાના દેશમાં વર્લ્ડકપનું આયોજન કરવા મક્કમ છે. ICC બાંગ્લાદેશમાં ચાલી રહેલી અશાંતિ પર પણ નજર રાખી રહ્યું છે.
