- યશસ્વી જયસ્વાલે આ દિવસોમાં આંતરરાષ્ટ્રીય ક્રિકેટમાં ધૂમ મચાવી
- શિવમ દુબેએ T20 ઇન્ટરનેશનલમાં એક અલગ જ છાપ છોડી
- આ બંનેને BCCIના નવા વાર્ષિક કરારમાં સ્થાન મળી શકે છે
ભારતીય ટીમના વર્તમાન યુવા સ્ટાર યશસ્વી જયસ્વાલે આ દિવસોમાં આંતરરાષ્ટ્રીય ક્રિકેટમાં ધૂમ મચાવી છે. T20 અને ટેસ્ટમાં તેણે ટીમ ઈન્ડિયા માટે રોહિત શર્મા સાથે ઓપનિંગમાં જગ્યા બનાવી લીધી છે. બીજી તરફ, શિવમ દુબેએ T20 ઇન્ટરનેશનલમાં એક અલગ જ છાપ છોડી છે. તેને હાર્દિક પંડ્યાના વિકલ્પ તરીકે પણ જોવામાં આવી રહ્યો છે. આ બંને સ્ટાર્સને આગામી દિવસોમાં BCCI તરફથી ખાસ ભેટ મળી શકે છે. એક અહેવાલ મુજબ, આ બંનેને BCCIના નવા વાર્ષિક કરારમાં સ્થાન મળી શકે છે.
કયા ગ્રેડમાં મળી શકે છે સ્થાન?
તમને જણાવી દઈએ કે BCCIનો સેન્ટ્રલ કોન્ટ્રાક્ટ ચાર ગ્રેડમાં વહેંચાયેલો છે. આ ચાર ગ્રેડ A+, A, B અને C છે, જેમાં A+ ખેલાડીઓને આખા વર્ષ માટે 7 કરોડ રૂપિયા મળે છે. જ્યારે A ગ્રેડના ખેલાડીઓને વાર્ષિક રૂ. 5 કરોડ, B ગ્રેડના ખેલાડીઓને રૂ. 3 કરોડ અને C ગ્રેડના ખેલાડીઓને વાર્ષિક રૂ. 1 કરોડ મળે છે. આવી સ્થિતિમાં યશસ્વી જયસ્વાલને B ગ્રેડમાં પ્રવેશ મળી શકે છે. જ્યારે શિવમ દુબે ગ્રેડ સીમાં જગ્યા બનાવી શકે છે. અથવા બંને સી ગ્રેડમાં જોડાઈ શકે છે.
BCCI ના વર્તમાન કોન્ટ્રાક્ટની યાદી
- ગ્રેડ A+: રોહિત શર્મા, વિરાટ કોહલી, જસપ્રીત બુમરાહ, રવિન્દ્ર જાડેજા.
- ગ્રેડ A: હાર્દિક પંડ્યા, રવિચંદ્રન અશ્વિન, મોહમ્મદ શમી, રિષભ પંત, અક્ષર પટેલ.
- ગ્રેડ B: ચેતેશ્વર પૂજારા, કેએલ રાહુલ, શ્રેયસ ઐયર, મોહમ્મદ સિરાજ, સૂર્યકુમાર યાદવ, શુભમન ગિલ.
- ગ્રેડ સી: ઉમેશ યાદવ, શિખર ધવન, શાર્દુલ ઠાકુર, ઈશાન કિશન, દીપક હુડા, યુઝવેન્દ્ર ચહલ, કુલદીપ યાદવ, વોશિંગ્ટન સુંદર, સંજુ સેમસન, અર્શદીપ સિંહ, કેએસ ભરત.
કયા ખેલાડીઓનુ કપાઇ શકે છે પત્તું?
શિખર ધવન અને દીપક હુડ્ડાનું સી ગ્રેડમાંથી પત્તુ કપાઈ શકે છે. બંને લાંબા સમયથી કોઈપણ ફોર્મેટમાં નથી રમ્યા. સાથે જ ટેસ્ટ ટીમમાંથી બહાર રહેલા ચેતેશ્વર પૂજારાને પણ ગ્રેડ Bમાંથી હટાવી શકાય છે. જ્યારે કુલદીપ યાદવને C માંથી B અથવા A ગ્રેડમાં પ્રમોટ કરી શકાય છે.
