- સ્ટાર ફાસ્ટ બોલર દીપક ચહર વાપસી માટે તૈયાર
- ચહરે છેલ્લી મેચ ડિસેમ્બર 2022 રમી હતી
- ચહરને IPL 2023માં હેમસ્ટ્રિંગ અને પીઠની સમસ્યા થઈ હતી
આઈપીએલમાં ચેન્નાઈ સુપર કિંગ્સ તરફથી રમી રહેલા ભારતીય સ્ટાર ફાસ્ટ બોલર દીપક ચહર ઈજામાંથી સાજા થઈ ગયા છે. ચહરે કહ્યું કે ઈજાઓ ખેલાડીઓના હાથમાં નથી. તે ફરી એકવાર ટીમ ઈન્ડિયામાં વાપસી કરવા તરફ જઈ રહ્યા છે. ચહરે તેની છેલ્લી મેચ ડિસેમ્બર 2022માં ભારત માટે રમી હતી. IPL 2023 દરમિયાન તેને હેમસ્ટ્રિંગ અને પીઠની સમસ્યા હતી, ત્યારબાદ તે ટૂર્નામેન્ટમાં 6 મેચ ચૂકી ગયા હતા.
ઈજા ખેલાડીઓના હાથમાં નથીઃ ચહર
ઈજાના કારણે ચહર સમગ્ર આઈપીએલ 2022 પણ મીસ કરી ગયા હતા. ઈજામાંથી સાજા થઈ રહેલા ચહરે ખાનગી ન્યૂઝ ચેનલ સાથે વાત કરતા કહ્યું, “ખેલાડીએ ઈજાથી નિરાશ ન થવું જોઈએ. આ વસ્તુઓ ખેલાડીના હાથમાં નથી. અત્યારે મારી પ્રાથમિકતા ટીમ માટે ફિટ અને ઉપલબ્ધ રહેવાની છે. જ્યારે પણ મને તક મળશે, હું ટીમ માટે 100 ટકા આપીશ.
તેણે આગળ કહ્યું, “મારા કિસ્સામાં એવું પણ કહી શકાય કે મારો સમય ખરાબ હતો. ગયા વર્ષે મને પીઠમાં ઈજા થઈ હતી, જે ફાસ્ટ બોલર માટે ગંભીર છે પરંતુ હવે હું સંપૂર્ણપણે ફિટ છું. હું અત્યારે મારી બોલિંગથી ખુશ છું. હું નેશનલ ટીમમાં વાપસી કરવાનો પ્રયાસ કરી રહ્યો છું. મેં તાજેતરમાં રાજસ્થાન પ્રીમિયર લીગ ટૂર્નામેન્ટ રમી હતી. રવિવાર સુધીમાં હું નેશનલ ક્રિકેટ એકેડમીમાં હતો. હું ભારતીય ટીમ સાથે પ્રેક્ટિસ કરી રહ્યો હતો, જે એશિયન ગેમ્સ માટે ચીન જઈ રહી છે."
હું વર્લ્ડ કપ જીતવા માંગુ છું: ચહર
દરેક ક્રિકેટરની જેમ દીપક ચહર પણ પોતાની કારકિર્દીમાં એકવાર વર્લ્ડ કપ જીતવા માંગે છે. ભારત માટે અત્યાર સુધી 13 ODI અને 24 T20 ઈન્ટરનેશનલ મેચ રમી ચૂકેલા ચહરે કહ્યું, “ક્રિકેટરનું સપનું વિશ્વ કપ રમવું અને દેશ માટે જીતવાનું હોય છે. જ્યારે પણ મને તક મળશે, હું તેને પૂર્ણ કરવાનો પ્રયાસ કરીશ.
