- ચેન્નાઈ સુપર કિંગ્સ અને સનરાઈઝર્સ હૈદરાબાદ વચ્ચે મેચ
- ચેપોકમાં રમાયેલી આ મેચમાં ચેન્નાઈનો 78 રને વિજય
- આ મેચમાં ચેન્નાઈનો કપ્તાન ગાયકવાડ થયો ઈજાગ્રસ્ત
IPL 2024માં 46મી મેચ ચેન્નાઈ સુપર કિંગ્સ અને સનરાઈઝર્સ હૈદરાબાદ વચ્ચે રમાઈ હતી. ચેપોકમાં રમાયેલી મેચમાં ચેન્નાઈનો 78 રને વિજય થયો હતો. પરંતુ આ જીત બાદ ચેન્નાઈ માટે મોટી મુશ્કેલી ઉભી થઈ શકે છે. વાસ્તવમાં CSKના કેપ્ટન રુતુરાજ ગાયકવાડ મેચ દરમિયાન ઈજાગ્રસ્ત થયા હતા. ગાયકવાડની આ ઈજા સીઝનના મધ્યમાં ચેન્નાઈની મુશ્કેલીઓ વધારી શકે છે. ફિલ્ડિંગ કરતી વખતે ગાયકવાડ ઈજાગ્રસ્ત થયો હતો.
ગાયકવાડ ઈજાગ્રસ્ત
ફિલ્ડિંગ કરતી વખતે ઈનિંગની 15મી ઓવરના ચોથા બોલ પર ગાયકવાડની આંગળીમાં ઈજા થઈ હતી, ત્યારબાદ ફિઝિયો પણ મેદાનમાં આવ્યો હતો. જો કે તેની ઈજા અંગે કોઈ વધુ અપડેટ નથી, ગાયકવાડ મેદાન પર મુશ્કેલીમાં દેખાતા હતા. આવી સ્થિતિમાં, તે જોવાનું રસપ્રદ રહેશે કે ગાયકવાડની ઈજા સિઝનના મધ્યમાં ચેન્નાઈને મુશ્કેલીમાં મૂકે છે કે નહીં.
તે ટીમ માટે બેટ્સમેનની સાથે કેપ્ટન તરીકે પણ સફળ રહ્યો છે. ગાયકવાડ હૈદરાબાદ સામેની મેચમાં સદી ફટકારવાનું ચૂકી ગયો હતો. તેણે 54 બોલમાં 10 ચોગ્ગા અને 3 છગ્ગાની મદદથી 98 રનની ઇનિંગ રમી હતી. આ દરમિયાન તેનો સ્ટ્રાઈક રેટ 181નો હતો. અગાઉ, લખનૌ સુપર જાયન્ટ્સ સામે રમાયેલી મેચમાં ગાયકવાડે કપ્તાની ઈનિંગ રમતા 108 રનની અણનમ સદી ફટકારી હતી.
શું હતી મેચની સ્થિતિ?
ચેપોકમાં રમાયેલી મેચમાં પ્રથમ બેટિંગ કરતા ચેન્નાઈની ટીમે 20 ઓવરમાં 3 વિકેટે 212 રન બનાવ્યા હતા. ટીમ માટે કેપ્ટન ગાયકવાડે સૌથી મોટી ઇનિંગ રમી હતી. આ સિવાય ડેરિલ મિચેલે ફિફ્ટીની ઇનિંગ રમી હતી અને 32 બોલમાં 52 રન બનાવ્યા હતા, જેમાં 7 ફોર અને 1 સિક્સ સામેલ હતી. ત્યારબાદ ટાર્ગેટનો પીછો કરવા ઉતરેલી હૈદરાબાદની ટીમ 18.5 ઓવરમાં 134 રનના સ્કોર પર ઓલઆઉટ થઈ ગઈ હતી.
