ભારતીય ક્રિકેટ ટીમે એશિયા કપ 2025ના લીગ તબક્કામાં શાનદાર પ્રદર્શન ચાલુ રાખીને પોતાનો વિજય રથ જાળવી રાખ્યો છે. ભારતે તેમના આખરી લીગ મુકાબલામાં ઓમાનને 21 રને હરાવીને ટૂર્નામેન્ટમાં અજેય રહીને સુપર-4માં પ્રવેશ કર્યો છે. જોકે, આ મેચમાં ઓમાને ભારતને સખત ટક્કર આપી હતી, જે પહેલા બે મેચમાં જોવા મળી નહોતી. ભારતે પ્રથમ બેટિંગ કરતા 20 ઓવરમાં 8 વિકેટે 188 રન બનાવ્યા હતા. આ લક્ષ્યનો પીછો કરતા ઓમાનની ટીમે 20 ઓવરમાં 4 વિકેટે 167 રન બનાવ્યા હતા.
ઓમાનનો મજબૂત પ્રતિકાર અને ભારતનો સ્કોર
189 રનના લક્ષ્યનો પીછો કરતા ઓમાનની શરૂઆત મજબૂત રહી હતી. ઓપનર જતિંદર સિંહ અને આમિર કલીમ વચ્ચે પ્રથમ વિકેટ માટે 56 રનની ભાગીદારી થઈ હતી. જતિંદર સિંહે 33 બોલમાં 32 રન બનાવીને ટીમને સારી શરૂઆત આપી, પરંતુ તેઓ કુલદીપ યાદવનો શિકાર બન્યા. આ પહેલા ભારતે બેટિંગમાં સંજુ સેમસનના 45 બોલમાં 56 રનની મદદથી સારો સ્કોર બનાવ્યો હતો. જ્યારે અભિષેક શર્માએ 15 બોલમાં ઝડપી 38 રન બનાવ્યા હતા. આ ઉપરાંત, અક્ષર પટેલે 12 બોલમાં 26 રનનું યોગદાન આપ્યું હતું, પરંતુ આ મેચમાં મોટા ભાગના બેટ્સમેનો ઝડપી આઉટ થયા હતા. ઓમાન તરફથી કલીમ અને ફૈસલે 2-2 વિકેટ લીધી હતી.
