Chris Woakes સિરીઝ માટે લેશે મોટું જોખમ! બોલરે કર્યો મોટો ખુલાસો

ઈંગ્લેન્ડના અનુભવી ફાસ્ટ બોલર ક્રિસ વોક્સને ઓવલમાં રમાયેલી ભારત સામેની પાંચમી ટેસ્ટ મેચમાં ખભામાં ઈજા થઈ હતી. આ ઈજાને કારણે તે બીજી ઈનિંગમાં બોલિંગ કરી શક્યો ન હતો.

ઈંગ્લેન્ડની બીજી ઈનિંગના અંતે તે એક હાથે બેટિંગ કરવા આવ્યો હતો. તેની ઈજા જોયા પછી ઘણા ક્રિકેટ નિષ્ણાતો માને છે કે ક્રિસ વોક્સ હવે એશિઝ સિરીઝમાંથી પણ બહાર થઈ શકે છે. આ દરમિયાન ઈંગ્લેન્ડના ફાસ્ટ બોલરે પોતે જ કહ્યું છે કે તે એશિઝમાં રમશે કે નહીં.

એશિઝ માટે ફિટ થવા માટે રિહેબનો વિકલ્પ પસંદ કરી શકે છે ક્રિસ વોક્સ

ક્રિસ વોક્સે કહ્યું છે કે તે આ વર્ષના અંતમાં એશિઝ સિરીઝ માટે ફિટ થવા માટે ખભાની સર્જરી કરાવવાને બદલે 'રિહેબિલિટેશન'નો વિકલ્પ પસંદ કરી શકે છે. ક્રિસ વોક્સની ઈજાનું સ્કેન કરવામાં આવ્યું છે અને તે પરિણામની રાહ જોઈ રહ્યો છે, પરંતુ તેનું માનવું છે કે તે આઠ અઠવાડિયાના રિહેબ દરમિયાન એશિઝ સિરીઝ પહેલા ફિટ થઈ શકે છે. પરંતુ તેને હજુ સુધી આ અંગે કોઈ નિર્ણય લીધો નથી.

ક્રિસ વોક્સે ઈજા અંગે આપ્યું મોટું નિવેદન

મીડિયા રિપોર્ટ મુજબ ક્રિસ વોક્સે કહ્યું કે "હું ઈજા કેટલી ગંભીર છે તે જોવા માટે રાહ જોઈ રહ્યો છું પરંતુ મને લાગે છે કે વિકલ્પ સર્જરી અથવા 'રિહેબિલિટેશન' હોઈ શકે છે. હું સંમત છું કે આ ઈજા મને ફરીથી પરેશાન કરી શકે છે, પરંતુ મને લાગે છે કે તે એક જોખમ હોઈ શકે છે જે હું લેવા તૈયાર છું."

ક્રિસ વોક્સ સ્કેન પરિણામો પછી લેશે નિર્ણય

ક્રિસ વોક્સે વધુમાં કહ્યું કે ફિઝિયો અને નિષ્ણાતો પાસેથી મેં જે સાંભળ્યું છે તે મુજબ સર્જરી પછી ફિટ થવામાં લગભગ ત્રણથી ચાર મહિના લાગશે. મારી આ ઈજા એશિઝ અને ઓસ્ટ્રેલિયા સિરીઝ સાથે સંબંધિત છે, તેથી તે મુશ્કેલ છે. રિહેબિલિટેશનમાં આઠ અઠવાડિયા લાગશે, તેથી આ એક વિકલ્પ હોઈ શકે છે. પરંતુ રિપોર્ટ આવ્યા પછી જ હું આ અંગે નિર્ણય લઈશ.