Englandને લોર્ડ્સ ટેસ્ટમાં આ ભૂલની ચૂકવવી પડી ભારે કિંમત, WTC પોઈન્ટ ટેબલમાં થયું નુકસાન

ભારત અને ઈંગ્લેન્ડ વચ્ચે ત્રીજી ટેસ્ટ મેચ લોર્ડ્સ ખાતે રમાઈ હતી. ઈંગ્લેન્ડે લોર્ડ્સ ટેસ્ટ મેચ 22 રનથી જીતીને સિરીઝમાં 2-1ની લીડ મેળવી હતી. જીત મેળવ્યા છતાં ઈંગ્લેન્ડની ટીમને જોરદાર નુકસાન થયું છે.

ઈંગ્લેન્ડને આ મેચમાં થયેલી ભૂલની ભારે કિંમત ચૂકવવી પડી હતી, જેના કારણે ટીમને વર્લ્ડ ટેસ્ટ ચેમ્પિયનશિપ 2025-27 પોઈન્ટ ટેબલમાં નુકસાનનો સામનો કરવો પડ્યો હતો. આ સિવાય ખેલાડીઓને મેચ ફીના 10 ટકા દંડ પણ ફટકારવામાં આવ્યો છે.

WTC પોઈન્ટ ટેબલમાં ઈંગ્લેન્ડના 2 પોઈન્ટ થયા કટ

લોર્ડ્સ ટેસ્ટના ઈંગ્લેન્ડની ટીમે બીજી ઈનિંગમાં શાનદાર બોલિંગ કરી હતી. જેના કારણે ભારતીય ટીમ 170 રનમાં ઓલઆઉટ થઈ ગઈ હતી. આ મેચમાં ઈંગ્લેન્ડની ટીમ સ્લો ઓવર રેટ માટે દોષિત સાબિત થઈ હતી. જેના કારણે ઈંગ્લેન્ડને વર્લ્ડ ટેસ્ટ ચેમ્પિયનશિપ પોઈન્ટ ટેબલમાં 2 પોઈન્ટનું નુકસાન થયું છે.

ઈંગ્લેન્ડ હવે WTC પોઈન્ટ ટેબલમાં બીજા સ્થાનેથી ત્રીજા સ્થાને સરકી ગયું છે, તેના 22 પોઈન્ટ છે. આ સિવાય તમામ ખેલાડીઓ પર મેચ ફીના 10% દંડ ફટકારવામાં આવ્યો છે.

ઈંગ્લેન્ડે બીજી ઈનિંગમાં બનાવ્યા હતા 192 રન

ટીમ ઈન્ડિયાની બોલિંગ બીજી ઈનિંગમાં પણ શાનદાર રહી હતી, જેના કારણે ટીમ બીજી ઈનિંગમાં 192 રનમાં જ ઓલઆઉટ થઈ ગઈ હતી. પરંતુ ઈંગ્લેન્ડની બોલિંગ તેના કરતા પણ સારી હતી. ટીમ ઈન્ડિયાને મેચ જીતવા માટે 193 રન બનાવવાના હતા, પરંતુ બીજી ઈનિંગમાં ભારતીય ટીમ 170 રનમાં જ ઓલઆઉટ થઈ ગઈ.

ટીમ ઈન્ડિયા તરફથી રવિન્દ્ર જાડેજાએ બીજી ઈનિંગમાં સૌથી વધુ અણનમ 61 રનની ઈનિંગ રમી હતી. આ સિવાય કેએલ રાહુલે 39 રન બનાવ્યા હતા. ઈંગ્લેન્ડ તરફથી બોલિંગ કરતી વખતે બેન સ્ટોક્સ અને જોફ્રા આર્ચરે 3-3 વિકેટ, બ્રાયડન કાર્સે 2 વિકેટ અને શોએબ બશીર-ક્રિસ વોક્સે 1-1 વિકેટ લીધી હતી.