ભારતની બીજી ટેસ્ટ મેચમાં રિષભ પંતે 58 બોલમાં 65 રનની તોફાની ઈનિંગ રમી. તેની ઈનિંગમાં રિષભ પંત 8 ચોગ્ગા અને 3 છગ્ગા ફટકારવામાં સફળ રહ્યો. રિષભ પંત જે રીતે રમી રહ્યો હતો તે જોઈને એવું લાગતું હતું કે આ બેટ્સમેન ટૂંક સમયમાં તેની સદી સુધી પહોંચી જશે. પરંતુ પંત શોએબ બશીરના બોલ પર આઉટ થઈ ગયો.
રિષભ પંત ભલે સદી પૂરી ન કરી શક્યો હોય પરંતુ તેની ઈનિંગથી ફેન્સ ખુશ થઈ ગયા. જ્યારે પંત બેટિંગ કરી રહ્યો હતો, ત્યારે હેરી બ્રુકે પણ તેને ઉશ્કેરવાનો બેસ્ટ પ્રયાસ કર્યો, જેનો વીડિયો સોશિયલ મીડિયા પર વાયરલ થઈ રહ્યો છે.
જ્યારે રિષભ પંત વિસ્ફોટક બેટિંગ કરી રહ્યો હતો અને ઈંગ્લેન્ડના બોલરોને હેરાન કરી રહ્યો હતો, ત્યારે બ્રુક સ્લિપમાં ઊભો રહીને તેની બેટિંગ જોઈ રહ્યો હતો, આ દરમિયાન બ્રુક પંત પાસે આવ્યો અને તેને ઉશ્કેરવાનો પ્રયાસ કરવા લાગ્યો. બંને વચ્ચે જે બન્યું તે સ્ટમ્પ માઈક પર રેકોર્ડ થયું હતું. હવે બંનેનો આ વીડિયો વાયરલ થઈ રહ્યો છે.
પંત અને બ્રુકનો વીડિયો થયો વાયરલ
બન્યું એવું કે જ્યારે રિષભ પંત ઝડપથી રન બનાવી રહ્યો હતો, ત્યારે સ્લિપમાં ફિલ્ડિંગ કરી રહેલા હેરી બ્રુક તેની પાસે આવ્યો અને તેને પૂછ્યું કે શું તે સૌથી ઝડપી સદી ફટકારવાનું વિચારી રહ્યો છે? આના પર રિષભ પંતે પૂછ્યું કે ટેસ્ટ ક્રિકેટમાં શું? બ્રુકે કહ્યું કે "મેં 55 બોલમાં સૌથી ઝડપી સદી ફટકારી છે, તમે આજે તે કરી શકો છો."
રિષભ પંતે બ્રુકને આપ્યો જડબાતોડ જવાબ
આ પછી રિષભ પંતે આપેલા જવાબે ફેન્સના દિલ જીતી લીધા. રિષભ પંતે જવાબ આપ્યો કે "હું લાલચી નથી. હું આ વિશે વિચારી રહ્યો નથી. હું ફક્ત ટીમ વિશે વિચારી રહ્યો છું." આ પછી હેરી બ્રુક કંઈ પણ બોલ્યા વિના ત્યાંથી નીકળી જાય છે. ફેન્સ આ વીડિયોને ખૂબ પસંદ કરી રહ્યા છે.
મેચની વાત કરીએ તો ટેસ્ટના ચોથા દિવસે બીજી ઈનિંગ છ વિકેટે 427 રન પર ડિકલેર કરવામાં આવી હતી અને ઈંગ્લેન્ડને જીતવા માટે 608 રનનો ટાર્ગેટ આપવામાં આવ્યો હતો, જેને સ્ટમ્પ સુધી ત્રણ વિકેટ ગુમાવ્યા બાદ 72 રન બનાવ્યા હતા. ભારતીય કેપ્ટન શુભમન ગિલ 161 રને પણ બીજી ઈનિંગમાં સદી ફટકારી હતી.
