ભારતીય મહિલા ટીમે પહેલી T20 મેચમાં ઈંગ્લેન્ડને 97 રનથી હરાવ્યું હતું. આ જીત સાથે ભારતે પાંચ મેચની T20 સિરીઝમાં 1-0 ની લીડ મેળવી લીધી છે. શનિવારે નોટિંગહામમાં રમાયેલી આ મેચમાં, ટોસ હારીને પ્રથમ બેટિંગ કર્યા બાદ, ભારતીય ટીમે કેપ્ટન સ્મૃતિ મંધાનાની સદીના આધારે 20 ઓવરમાં પાંચ વિકેટ ગુમાવીને 210 રન બનાવ્યા હતા.
જેના જવાબમાં ઈંગ્લેન્ડની મહિલા ટીમ 14.5 ઓવરમાં ફક્ત 113 રન બનાવી શકી અને ઓલઆઉટ થઈ ગઈ. ઈંગ્લેન્ડ માટે કેપ્ટન નેટ સિવર બ્રન્ટે સૌથી વધુ 66 રનની ઈનિંગ રમી. ભારત માટે શ્રી ચારાનીએ ચાર વિકેટ લીધી જ્યારે દીપ્તિ શર્મા અને રાધા યાદવે 2-2 વિકેટ લીધી. આ સિવાય અમનજોત કૌર અને અરુંધતી રેડ્ડીએ 1-1 વિકેટ લીધી. હવે બંને ટીમો 1 જુલાઈએ બીજી T20 મેચમાં એકબીજાનો સામનો કરશે. આ મેચ બ્રિસ્ટોલમાં રમાશે.
T20માં સદી ફટકારનાર બીજી ભારતીય મહિલા
ભારત માટે સ્મૃતિ મંધાના પહેલા હરમનપ્રીત એકમાત્ર મહિલા ખેલાડી હતી જેની કૌર T20 ઈન્ટરનેશનલમાં સદી ફટકારી હતી . હરમનપ્રીતે 2018 માં ન્યુઝીલેન્ડ સામે માત્ર 49 બોલમાં આ સિદ્ધિ મેળવી હતી. સ્મૃતિ મંધાનાએ ઈંગ્લેન્ડ સામે 51 બોલમાં આ સિદ્ધિ મેળવી છે. આ ઈનિંગ દરમિયાન સ્મૃતિ મંધાનાએ પહેલા 27 બોલમાં પોતાની અડધી સદી પૂરી કરી અને તે પછી પણ તેનું બેટ અટક્યું નહીં. તે સૌથી ઝડપી સદીના મામલે બીજા સ્થાને પહોંચી ગઈ છે. આ મેચમાં તેને 62 બોલનો સામનો કરીને 112 રનની ઈનિંગ રમી.
ત્રણેય ફોર્મેટમાં સદી ફટકારનાર પહેલી ભારતીય મહિલા
સ્મૃતિ મંધાના વર્લ્ડ ક્રિકેટમાં બેટથી પોતાની છાપ છોડી રહી છે. સમય જતાં તેમનું ફોર્મ સારું થતું જાય છે. આ સદી સાથે તે ભારત માટે ટેસ્ટ, વનડે અને T20 આંતરરાષ્ટ્રીયમાં સદી ફટકારનારી પહેલી મહિલા ક્રિકેટર બની ગઈ છે. આ પહેલા ભારતીય મહિલા ક્રિકેટના ઈતિહાસમાં કોઈ આ સિદ્ધિ મેળવી શક્યું નથી. વર્લ્ડ લેવલની વાત કરીએ તો તે આવું કરનારી પાંચમી મહિલા ખેલાડી બની છે.
ટીમ ઈન્ડિયાએ બનાવ્યો બીજો સૌથી મોટો સ્કોર
ઈંગ્લેન્ડ સામેની આ મેચમાં સ્મૃતિ મંધાના સાથે હરલીન દેઓલે પણ તોફાની ઈનિંગ્સ રમી. તેને 23 બોલનો સામનો કરીને 43 રન બનાવ્યા. ભારતીય બેટ્સમેનોએ શાનદાર બેટિંગ કરી અને બીજો સૌથી વધુ સ્કોર બનાવ્યો. 20 ઓવરમાં ટીમે 5 વિકેટ ગુમાવીને 210 રન બનાવ્યા. આ પહેલા વર્ષ 2024માં ટીમે વેસ્ટ ઈન્ડિઝ સામે 217 રન બનાવ્યા હતા.
