કારકિર્દીની છેલ્લી ટેસ્ટ બાદ ડેવિડ વોર્નરને પાકિસ્તાન ટીમ તરફથી મળી ખાસ ભેટ

• ડેવિડ વોર્નરે તેની છેલ્લી ટેસ્ટ સિડનીમાં પાકિસ્તાન સામે રમી
  
• પાકિસ્તાનની ટીમે ડેવિડ વોર્નરને એક ખાસ ભેટ આપી હતી
• પાકિસ્તાને ડેવિડ વોર્નરને બાબર આઝમની જર્સી ભેટમાં આપી

ડેવિડ વોર્નરે તેની કારકિર્દીની છેલ્લી ટેસ્ટ સિડનીના સિડની ક્રિકેટ ગ્રાઉન્ડમાં પાકિસ્તાન સામે રમી હતી. છેલ્લી ટેસ્ટ વોર્નર માટે ઘણી સારી રહી કારણ કે ઓસ્ટ્રેલિયાએ મેચ જીતી લીધી હતી. મેચમાં ટાર્ગેટનો પીછો કરતી વખતે વોર્નરે 7 ફોરની મદદથી 57 રન બનાવ્યા હતા. કરિયરની છેલ્લી ટેસ્ટ બાદ પાકિસ્તાનની ટીમે વોર્નરને એક ખાસ ભેટ આપી હતી.

હકીકતમાં, પાકિસ્તાને ટેસ્ટ ક્રિકેટને અલવિદા કહી ચૂકેલા ડેવિડ વોર્નરને બાબર આઝમની જર્સી ભેટમાં આપી હતી, જેના પર પાકિસ્તાની ખેલાડીઓના હસ્તાક્ષર હતા. પાકિસ્તાનના કેપ્ટન શાન મસૂદે વોર્નરને ગિફ્ટમાં જર્સી આપી હતી.

વોર્નરની ટેસ્ટ કારકિર્દી

વોર્નરે પોતાના ટેસ્ટ કરિયરમાં 112 મેચ રમી છે, જેમાં 205 ઇનિંગ્સમાં બેટિંગ કરીને 44.59ની એવરેજથી 8786 રન બનાવ્યા છે. આ દરમિયાન તેણે 26 સદી અને 37 ફિફટી ફટકારી હતી. વોર્નરે ડિસેમ્બર 2011માં ન્યૂઝીલેન્ડ સામે ટેસ્ટ ડેબ્યૂ કર્યું હતું.

આ રીતે ઓસ્ટ્રેલિયાએ ત્રીજી ટેસ્ટ જીતી હતી

ત્રીજી ટેસ્ટમાં પાકિસ્તાને ટોસ જીતીને બેટિંગ કરવાનો નિર્ણય કર્યો અને 313 રન બોર્ડ પર મૂક્યા. ત્યારપછી જવાબમાં પોતાની પ્રથમ ઈનિંગમાં બેટિંગ કરવા આવેલી ઓસ્ટ્રેલિયા 299 રનમાં ઓલઆઉટ થઈ ગઈ હતી, જે બાદ એવું લાગી રહ્યું હતું કે પાકિસ્તાન અહીંથી મેચ જીતી શકશે. પરંતુ ત્યારબાદ ઓસ્ટ્રેલિયાએ વાપસી કરી અને પાકિસ્તાનને તેની બીજી ઇનિંગમાં માત્ર 115 રનમાં ઓલઆઉટકરી દીધું. પાકિસ્તાનને 115 રનમાં ઓલઆઉટ કર્યા બાદ ઓસ્ટ્રેલિયાને માત્ર 130 રનનો ટાર્ગેટ મળ્યો હતો, જેને તેણે 25.5 ઓવરમાં 2 વિકેટે જીતીને હાંસલ કરી લીધો હતો.

નોંધનીય છે કે ત્રણ મેચોની ટેસ્ટ સિરીઝમાં ઓસ્ટ્રેલિયાની આ સતત ત્રીજી જીત હતી, જેની સાથે તેણે સિરીઝ 3-0થી જીતી લીધી હતી. પર્થમાં રમાયેલી સિરીઝની પ્રથમ મેચમાં ઓસ્ટ્રેલિયાએ પાકિસ્તાનને 360 રને અને મેલબોર્નમાં રમાયેલી બીજી ટેસ્ટમાં 79 રનથી હરાવ્યું હતું.