- અમેરિકામાં મેજર ક્રિકેટ લીગ રમાઇ રહી
- IPL 2024ની હરાજીમાં એલન અનસોલ્ડ રહ્યો હતો
- MLCમાં ફિન એલને રમી તોફાની ઇનિંગ
અમેરિકામાં મેજર ક્રિકેટ લીગ રમાઇ રહી છે. આમાં ઘણા ખેલાડીઓ સૌને ચોંકાવતા જોવા મળ્યા છે. આવું જ કારનામું ફિન એલને કર્યું છે. IPL 2024ની હરાજીમાં ફિન એલન અનસોલ્ડ રહ્યો હતો. એલનની મૂળ કિંમત રૂ. 75 લાખ હોવા છતાં કોઇ ખરીદવા તૈયાર થયું ન હતું. હવે IPL 2025 પહેલા કરી બતાવ્યું છે કે તે કોઈથી ઓછો નથી. તેની તાકાત કોઈ બાબતમાં ઓછી નથી. તેની પાસે સિક્સર મારવાની અદભૂત શક્તિ છે. તેણે એક પછી એક 15 સિક્સર ફટકારી છે.
34 બોલ પહેલા જીત્યું સાન ફ્રાન્સિસ્કો યુનિકોર્ન
MLC 2024 માં મેચ સિએટલ ઓર્કાસ અને સાન ફ્રાન્સિસ્કો યુનિકોર્ન વચ્ચે રમાઇ હતી. 20 જુલાઈના રોજ રમાયેલી આ મેચમાં, સિએટલ ઓર્કાસને સાન ફ્રાન્સિસ્કો યુનિકોર્ન્સ દ્વારા 34 બોલ બાકી રહેતા 6 વિકેટથી હરાવ્યું હતું, જેમાં 26 વર્ષના જમણા હાથના કિવી બેટ્સમેન ફિન એલને મોટી ભૂમિકા ભજવી હતી. સિએટલ ઓર્કાસ દ્વારા આપવામાં આવેલા 153 રનના ટાર્ગેટનો પીછો કરતી વખતે ઓપનર ફિન એલને માત્ર 30 બોલમાં એવી વિનાશક ઈનિંગ રમી હતી કે મેચનો નિર્ણય ત્યાં જ થઈ ગયો હતો.
અત્યાર સુધીમાં 15 છગ્ગા… માત્ર 30 બોલમાં મચાવી તબાહી
સાન ફ્રાન્સિસ્કો યુનિકોર્નના બેટ્સમેન ફિન એલને 256થી વધુની સ્ટ્રાઈક રેટ સાથે અદભૂત બેટિંગ કરી હતી. સિએટલ ઓર્કાસ સામે ફિનના બેટનો આ વિસ્ફોટ 30 બોલમાં જોવા મળ્યો હતો. તેણે 30 બોલમાં 6 છગ્ગા અને 8 ચોગ્ગા સાથે 77 રન બનાવ્યા, જે મેજર લીગ ક્રિકેટમાં તેના બેટમાંથી સૌથી વધુ સ્કોર છે. આ મોટા સ્કોર સાથે ફિન એલને લીગની વર્તમાન સિઝનમાં 5 મેચ બાદ 202.17ના સ્ટ્રાઈક રેટ સાથે 186 રન બનાવ્યા છે. આ દરમિયાન ફિનના બેટમાંથી કુલ 15 સિક્સર વાગી હતી.
ફિન એલનને RCBએ ખરીદ્યો હતો
જોકે ફિન એલનને IPL 2024ની હરાજીમાં કોઈ ખરીદનાર મળ્યો ન હતો. પરંતુ, તે પહેલા તે RCB ટીમ સાથે જોડાયેલો હતો. IPL 2021માં, RCBએ તેને જોશ ફિલિપ્સના સ્થાને સામેલ કર્યો હતો. તે પછી, IPL 2022ની હરાજીમાં, RCBએ ફિન એલનને 80 લાખ રૂપિયામાં ખરીદ્યો. MLC 2024માં તેનું પ્રદર્શન જોયા બાદ આશા છે કે હવે તેને IPL 2025ની હરાજીમાં સારી એવી રકમ મળી શકે છે.
