PAK Vs ENG: એલેક્સ હાલેસે 41 મહિના બાદ અડધી સદી ફટકારી

• પ્રથમ T20માં ઇંગ્લેન્ડે પાકિસ્તાનને છ વિકેટે હરાવ્યું
  
• સાત મેચની શ્રેણીમાં 1-0ની લીડ મેળવી
• પાકિસ્તાન 7/158, ઇંગ્લેન્ડ 4/160, હાલેસ 53

ઓપનર એલેક્સ હાલેસની અડધી સદી અને હેરી બ્રૂકના અણનમ 42 રનની મદદથી ઇંગ્લેન્ડે અહીં રમાયેલી પ્રથમ T20 ઇન્ટરનેશનલ મેચમાં પાકિસ્તાનને છ વિકેટે હરાવીને સાત મેચની શ્રેણીમાં 1-0ની લીડ મેળવી લીધી હતી. પાકિસ્તાનના સાત વિકેટે 158 રનના જવાબમાં ટોસ જીતીને પ્રથમ ફિલ્ડિંગ કરનાર ઇંગ્લેન્ડની ટીમે ચાર બોલ બાકી રાખીને 19.2 ઓવરમાં ચાર વિકેટે 160 રન બનાવીને વિજય હાંસલ કરી લીધો હતો.

એલેક્સ હાલેસની અડધી સદી

મેન ઓફ ધ મેચ બનેલા લૂક વૂડે 24 રનમાં ત્રણ વિકેટ ઝડપી હતી. ઓપનર હાલેસે 41 મહિના બાદ ટીમમાં પુનરાગમન કર્યું હતું અને તેણે 40 બોલમાં સાત બાઉન્ડ્રી વડે 53 રનની ઇનિંગ રમી હતી. હાલેસ છેલ્લે 2019માં ઇંગ્લેન્ડ તરફથી રમ્યો હતો. હાલેસને પ્રતિબંધિત ડ્રગ્સનું સેવન કરવા બદલ 2019માં સસ્પેન્ડ કરી દેવામાં આવ્યો હતો. પાકિસ્તાનના ઉસ્માન કાદિરે ડેવિડ મલાન (20) તથા બેન ડકેટને (21) આઉટ કરીને પાકિસ્તાનને મેચમાં પાછા લાવવાનો પ્રયાસ કર્યો હતો પરંતુ હાલેસ અને બ્રૂકે ચોથી વિકેટ માટે 55 રનની ભાગીદારી નોંધાવીને ઇંગ્લેન્ડને વિજય અપાવી દીધો હતો.

મોહમ્મદ રિઝવાનની ફિફ્ટી

પાકિસ્તાના ઓપનર મોહમ્મદ રિઝવાને 46 બોલમાં 68 તથા સુકાની બાબર આઝમે 31 રનની ઇનિંગ રમી હતી. મિડલ ઓર્ડરમાં ઇફ્તિખાર એહમદે 28 રનનું યોગદાન આપ્યું હતું. લેગ સ્પિનર આદિલ રશીદે 27 રનમાં બે વિકેટ ખેરવી હતી.