- આજે સુપર સન્ડેમાં FIFA વર્લ્ડ કપની ફાઈનલ
- ડીફેન્ડીંગ ચેમ્પિયન ફ્રાન્સનો સામનો આર્જેન્ટિના સામે
- 2018 વર્લ્ડ કપમાં ફ્રાન્સે આર્જેન્ટિનાને 4-3થી હરાવ્યું હતું
FIFA વર્લ્ડ કપની ફાઇનલ મેચમાં હવે ગણતરીના કલાકો જ બાકી છે. આર્જેન્ટિના અને ફ્રાન્સની ટીમો એકબીજા સાથે સ્પર્ધા કરવા માટે સંપૂર્ણ રીતે તૈયાર છે. એક તરફ લિયોનેલ મેસ્સીની ટીમ 36 વર્ષ બાદ ટાઈટલ જીતવા માટે જોઈ રહી છે. બીજી તરફ ફ્રાન્સ સતત બીજી વખત ટ્રોફી જીતવામાં કોઈ કસર છોડશે નહીં. બંને ટીમોમાં એવા દિગ્ગજ ખેલાડીઓ છે જેમની સામે ઘણી મોટી ટીમોએ દમ તોડી દીધો છે. ફાઈનલ મેચ કતારના હુસૈન સ્ટેડિયમમાં રમાશે.
2018 વર્લ્ડ કપમાં ફ્રાન્સે આર્જેન્ટિનાને હરાવ્યું હતું
આર્જેન્ટિનાના સુકાની લિયોનેલ મેસ્સી પોતાની ટીમને ટ્રોફી અપાવવા તૈયાર છે. બંને ટીમો વચ્ચે અત્યાર સુધીમાં 12 મેચ રમાઈ છે જેમાંથી આર્જેન્ટિનાએ 6 વખત જીત મેળવી છે જ્યારે ફ્રાન્સ માત્ર ત્રણ વખત જીત્યું છે. આ સાથે જ ત્રણ મેચ ડ્રો સાબિત થઈ હતી. પરંતુ 2018ના વર્લ્ડ કપમાં ફ્રાન્સની ટીમે નોકઆઉટ મેચમાં આર્જેન્ટિનાને 4-3થી હરાવ્યું હતું. આ મેચમાં મેસ્સી એક પણ ગોલ કરી શક્યો ન હતો જ્યારે એમબાપ્પેએ બે ગોલ કર્યા હતા. 4 વર્ષ બાદ મેસ્સીની ટીમ તેમના 'ઘા'ને મટાડવાનો પ્રયાસ કરશે.
બંને ટીમો બે વખત ટાઈટલ જીતી ચૂકી છે
બંને ટીમો અત્યાર સુધીમાં બે વખત ટાઈટલ જીતી ચૂકી છે. ફ્રાન્સે 1998 અને 2018માં વર્લ્ડ કપની ટ્રોફી પોતાના નામે કરી હતી. જ્યારે આર્જેન્ટિનાએ 1978 અને 1986માં ટ્રોફી જીતી હતી. 36 વર્ષ પછી લિયોનેલ મેસ્સી તેની ટીમ માટે ટ્રોફી જીત્યા બાદ ટુર્નામેન્ટને વિદાય આપવા માંગશે. આ પહેલા મેસ્સી 2014માં વર્લ્ડ કપની ફાઈનલ રમ્યો હતો. તે દરમિયાન ટીમને જર્મની સામે હારનો સામનો કરવો પડ્યો હતો.
મેસ્સી-એમબાપ્પે વચ્ચે જોરદાર ટક્કર થશે
2018 વર્લ્ડ કપ દરમિયાન, મેસ્સી ફ્રાન્સ સામે એક પણ ગોલ કરવામાં સફળ રહ્યો ન હતો. પરંતુ આ મેચમાં તે 4 વર્ષ પહેલાના ઘાને રૂઝાવવાની આશા સાથે મેદાનમાં ઉતરશે. પરંતુ તેનો મુકાબલો ફ્રાન્સના દિગ્ગજ ખેલાડી કીલિયન એમબાપ્પે સામે થશે, જેણે મેસ્સીની જેમ આ ટુર્નામેન્ટમાં પાંચ ગોલ કર્યા છે. હુસૈન સ્ટેડિયમમાં બંને ખેલાડીઓ વચ્ચે જોરદાર મુકાબલો જોવા મળી શકે છે.
