- IPLની શરૂઆત પહેલા CSKએ એક મોટી જાહેરાત કરી
- ધોનીની જગ્યાએ ગાયકવાડને બનાવાયો ટીમનો કેપ્ટન
- એમએસ ધોનીની છેલ્લી સિઝન હોવાની અટકળો તેજ
ઈન્ડિયન પ્રીમિયર લીગ 2024ના ઉદ્ઘાટનના એક દિવસ પહેલા ગુરુવારે ચેન્નાઈ સુપર કિંગ્સે એક મોટી જાહેરાત કરી. ફ્રેન્ચાઈઝીએ મહેન્દ્ર સિંહ ધોનીની જગ્યાએ યુવા ઋતુરાજ ગાયકવાડને ચેન્નાઈ સુપર કિંગ્સની કેપ્ટન્સી સોંપી. મતલબ કે ધોની 17મી સીઝનમાં એક ખેલાડી તરીકે મેદાન પર જોવા મળશે. આવી સ્થિતિમાં એવી અટકળો લગાવવામાં આવી રહી છે કે શું આ ધોનીની છેલ્લી સિઝન છે.
ફ્રેન્ચાઇઝીએ સત્તાવાર નિવેદન બહાર પાડ્યું
ચેન્નાઈ સુપર કિંગ્સે એક સત્તાવાર નિવેદનમાં જણાવ્યું કે, “એમએસ ધોનીએ ટાટા IPL 2024ની શરૂઆત પહેલા ચેન્નાઈ સુપર કિંગ્સની કપ્તાની ઋતુરાજ ગાયકવાડને સોંપી દીધી છે. ઋતુરાજ 2019 થી ચેન્નાઈ સુપર કિંગ્સનો અભિન્ન ભાગ છે અને આ સમયગાળા દરમિયાન તેણે IPLમાં 52 મેચ રમી છે. ફ્રેન્ચાઈઝીના નિવેદનથી સ્પષ્ટ છે કે ધોનીએ પોતે જ કેપ્ટનશિપ છોડવાનો નિર્ણય લીધો છે, તેમના પર કેપ્ટનશિપ છોડવાનું કોઈ દબાણ નથી. સુકાની પદ છોડ્યા બાદ ધોની ટૂંક સમયમાં IPLને પણ અલવિદા કહી શકે છે.
મહેન્દ્ર સિંહ ધોની 42 વર્ષના છે. તે બેટિંગમાં સતત પોતાની જાતને ડિમોટ કરી રહ્યો છે. ગત સિઝનમાં ઘણી વખત તે વિકેટો વચ્ચે દોડીને ખૂબ થાકેલા દેખાતા હતા. ધોનીએ ગત સિઝન જીત્યા બાદ ઘૂંટણની સર્જરી કરાવી હતી. આ પછી હવે તે કમબેક કરવા માટે તૈયાર છે. ચાહકોનું માનવું છે કે જો ધોનીએ કેપ્ટન્સી છોડી દીધી છે તો તેણે આગામી સિઝનની તમામ મેચો રમવી જોઈએ નહીં.
ચેન્નાઈએ 5 વખત ખિતાબ જીત્યો
મહેન્દ્ર સિંહ ધોનીની કપ્તાનીમાં CSKએ 5 વખત IPLનો ખિતાબ જીત્યો છે. ફ્રેન્ચાઇઝીએ વર્ષ 2010, 2011, 2018, 2021 અને 2023માં માહીની આગેવાની હેઠળ ટ્રોફી ઉપાડી હતી. IPLમાં કેપ્ટન કૂલના પ્રદર્શનની વાત કરીએ તો તેણે 250 મેચની 217 ઇનિંગ્સમાં 5082 રન બનાવ્યા છે. આ દરમિયાન તેણે 24 અર્ધસદી પણ ફટકારી છે. IPLમાં તેનો સર્વોચ્ચ સ્કોર 84 રન છે.
