- દ્રવિડનો કાર્યકાળ T20 વર્લ્ડકપ 2024 બાદ સમાપ્ત થશે
- રાહુલ દ્રવિડે આ પદ માટે ફરીથી અરજી કરવાનો ઈન્કાર કર્યો
- BCCI ગૌતમ ગંભીરની મુખ્ય કોચ તરીકે નિમણૂક કરી શકે
ભારતીય ક્રિકેટ ટીમના નવા મુખ્ય કોચને લઈને ઘણી ચર્ચા ચાલી રહી છે. BCCI કોઈપણ સમયે પૂર્વ ભારતીય ક્રિકેટર ગૌતમ ગંભીરની મુખ્ય કોચ તરીકે નિમણૂકની જાહેરાત કરી શકે છે. મુખ્ય કોચ પદ માટે અરજી કરનાર ગંભીર એકમાત્ર ઉમેદવાર છે. તે જ સમયે, બીસીસીઆઈએ મુખ્ય કોચ બનવા માટે ગૌતમ ગંભીરનો ઈન્ટરવ્યુ પણ લીધો છે.
આ સિવાય ગંભીરે કોચ બનવાને લઈને BCCI સમક્ષ કેટલીક શરતો પણ મૂકી હતી. અહેવાલો અનુસાર, BCCIએ પણ ગંભીરની શરતો સ્વીકારી લીધી છે. હવે ગંભીરની એક ખાસ શરત સામે આવી છે જે કેટલાક સિનિયર ખેલાડીઓ વિરાટ કોહલી, રોહિત શર્મા, રવિન્દ્ર જાડેજા અને મોહમ્મદ શમી સાથે સંબંધિત છે. જેના કારણે ચાહકોને પણ થોડો આંચકો લાગી શકે છે.
શું છે ગંભીરની આ શરત?
વાસ્તવમાં, ICC ચેમ્પિયન્સ ટ્રોફી વર્ષ 2025માં પાકિસ્તાનમાં શરૂ થશે. રિપોર્ટ અનુસાર, આ ચેમ્પિયન્સ ટ્રોફી વિરાટ કોહલી, રોહિત શર્મા, રવિન્દ્ર જાડેજા અને મોહમ્મદ શમી જેવા સિનિયર ખેલાડીઓ માટે છેલ્લી તક હોઈ શકે છે. જો ટીમ ઈન્ડિયા આ ખેલાડીઓ સાથે ટાઈટલ જીતવામાં સફળ નહીં થાય તો આ ખેલાડીઓને ટીમમાંથી બહાર કરી શકાય છે. જો કે, આ ખેલાડીઓને કયા ફોર્મેટમાંથી બહાર કરી શકાય તે અંગે હજુ સુધી કોઈ માહિતી નથી.
રાહુલ દ્રવિડનો કાર્યકાળ સમાપ્ત
મુખ્ય કોચ બન્યા બાદ ગૌતમ ગંભીર વર્લ્ડકપ 2027 સુધી ટીમનો રોડમેપ તૈયાર કરવા જઈ રહ્યો છે. ગૌતમ ગંભીર યુવા ટીમ ઈન્ડિયાને સફેદ બોલ ક્રિકેટમાં તૈયાર કરવા ઈચ્છે છે. ટીમ ઈન્ડિયા હાલમાં T20 વર્લ્ડકપમાં ધૂમ મચાવી રહી છે. હાલ ભારતીય ટીમના મુખ્ય કોચ રાહુલ દ્રવિડ છે. રાહુલ દ્રવિડનો કાર્યકાળ T20 વર્લ્ડકપ 2024 બાદ સમાપ્ત થશે. આ કારણે BCCI લાંબા સમયથી ટીમ ઈન્ડિયા માટે નવા હેડ કોચની શોધ કરી રહી છે. જ્યારે વર્તમાન કોચ રાહુલ દ્રવિડે આ પદ માટે ફરીથી અરજી કરવાનો ઈન્કાર કરી દીધો છે. જે બાદ હવે ગૌતમ ગંભીર BCCIની પહેલી પસંદ બની ગયો છે.
