WTC 2025ની ફાઈનલની તારીખો જાહેર, ભારત આ ઐતિહાસિક મેદાનમાં રચી શકે ઇતિહાસ

• ICCએ WTC 2025ની ફાઈનલ મેચની તારીખ જાહેર કરી
  
• ઈંગ્લેન્ડના ઐતિહાસિક મેદાન લોર્ડ્સમાં 11-15 જૂને રમાશે
• 16 જૂનને અનામત દિવસ તરીકે રાખવામાં આવ્યો છે

ICCએ વર્લ્ડ ટેસ્ટ ચેમ્પિયનશિપ 2025ની ફાઈનલ મેચની તારીખ જાહેર કરી છે. ફાઈનલ મેચ ઈંગ્લેન્ડના ઐતિહાસિક મેદાન લોર્ડ્સમાં 11-15 જૂને રમાશે. જરૂરિયાતના કિસ્સામાં, 16 જૂનને અનામત દિવસ તરીકે રાખવામાં આવ્યો છે. વર્લ્ડ ટેસ્ટ ચેમ્પિયનશિપના ઈતિહાસમાં આ ત્રીજી ફાઈનલ મેચ હશે અને લોર્ડ્સ પ્રથમ વખત ટાઈટલ ટક્કરનું આયોજન કરવા જઈ રહ્યું છે.

ICCએ કરી જાહેરાત

આઈસીસીના સીઈઓએ આ સંદર્ભમાં એક નિવેદન જારી કરીને કહ્યું કે, "વર્લ્ડ ટેસ્ટ ચેમ્પિયનશિપની ફાઈનલ ખૂબ જ ઓછા સમયમાં ક્રિકેટ જગતની સૌથી રોમાંચક ઈવેન્ટમાંની એક બની ગઈ છે. તેથી, અમે 2025ની ફાઇનલ મેચની તારીખની જાહેરાત કરતાં ખૂબ જ ખુશ છીએ. આ વિશ્વમાં ટેસ્ટ ક્રિકેટની વધતી જતી અપીલની ઓળખ છે જેણે સમગ્ર વિશ્વના ચાહકોને તેના માટે દિવાના બનાવી દીધા છે. ટિકિટની માંગ ઘણી વધારે હશે, તેથી હું લોકોને વિનંતી કરી રહ્યો છું કે તેઓ આવતા વર્ષની મેચ માટે હમણાં જ ટિકિટ બુક કરાવે."

પ્રથમ ફાઈનલ સાઉથેમ્પ્ટનમાં રમાઈ

WTCની પ્રથમ ફાઈનલ 2021માં સાઉથેમ્પ્ટનમાં રમાઈ હતી, જ્યારે 2023ની ટાઈટલ ટક્કર ઓવલ મેદાનમાં યોજાઈ હતી. અત્યાર સુધી ન્યુઝીલેન્ડ અને ઓસ્ટ્રેલિયાએ અનુક્રમે 2021 અને 2023માં આ ખિતાબ જીત્યો છે. બંને વખત ભારતને ફાઈનલ મેચમાં હારનો સામનો કરવો પડ્યો હતો.

પ્રથમ વખત ટીમ ઈન્ડિયાને ન્યૂઝીલેન્ડના હાથે હારનો સામનો કરવો પડ્યો હતો અને ત્યારબાદ 2023માં ઓસ્ટ્રેલિયાના હાથે હારનો સામનો કરવો પડ્યો હતો. 2025ની ફાઈનલ કઈ ટીમો વચ્ચે રમાશે તે હજુ નક્કી થયું નથી. હાલમાં, ભારત અને ઓસ્ટ્રેલિયા પોઈન્ટ ટેબલમાં અનુક્રમે પ્રથમ અને બીજા સ્થાને છે. આગામી કેટલાક મહિનામાં તમામ ટીમો ઘણી બધી ટેસ્ટ મેચો રમવા જઈ રહી છે, ત્યાર બાદ સ્થિતિ નક્કી થશે કે કઈ ટીમો ટાઈટલ ટક્કર રમશે.