ભારત અને બાંગ્લાદેશ વચ્ચે બે મેચની ટેસ્ટ સિરીઝની બીજી મેચ કાનપુરમાં રમાઈ હતી. ટીમ ઈન્ડિયાએ આ મેચ 7 વિકેટે જીતી લીધી હતી. મેચના લગભગ અઢી દિવસ વરસાદને કારણે વેડફાયા હતા, પરંતુ તેમ છતાં રોહિત બ્રિગેડનો વિજય થયો હતો. કાનપુરમાં ભારત સામેની હાર બાદ બાંગ્લાદેશના કેપ્ટન નઝમુલ હુસૈન શાંતોએ બેટ્સમેનોને જવાબદાર ઠેરવ્યા હતા. શાંતોએ નિવેદન એવી રીતે આપ્યું કે જાણે તે કોઈ બહાનું કાઢતો હોય.
શાંતોએ કહ્યું કે ખરાબ બેટિંગના કારણે બાંગ્લાદેશ બંને ટેસ્ટ હારી ગયું. અશ્વિન અને જાડેજાનું ઉદાહરણ આપતા બાંગ્લાદેશી કેપ્ટને સમજાવ્યું કે કેવી રીતે ચેન્નાઈ ટેસ્ટમાં નિર્ણાયક સમયે બંને બેટ્સમેનોએ શાનદાર ભાગીદારી બનાવી હતી.
અમે બંને ટેસ્ટમાં સારી બેટિંગ કરી નથી: શાંતો
મેચ બાદ નઝમુલ હુસૈન શાંતોએ કહ્યું, "અમે બંને ટેસ્ટમાં સારી બેટિંગ કરી નથી. આ સ્થિતિમાં અમારે માત્ર સારી બેટિંગ કરવાની જરૂર છે. જો તમે અમારા બેટ્સમેનોને જુઓ તો અમે 30-40 બોલ રમ્યા અને આઉટ થયા." તે સમયે અશ્વિન અને જાડેજાએ જે રીતે બેટિંગ કરી, તે ભાગીદારીએ અમારી પાસેથી મેચ છીનવી લીધી, તે સારું હતું.
જયસ્વાલ પ્લેયર ઓફ ધ મેચ બન્યો
યશસ્વી જયસ્વાલે કાનપુર ટેસ્ટમાં ભારત માટે બંને દાવમાં અડધી સદી ફટકારી હતી, જેના માટે તેને પ્લેયર ઓફ ધ મેચનો ખિતાબ આપવામાં આવ્યો હતો. જયસ્વાલ તરફથી જોરદાર બેટિંગ જોવા મળી હતી. પ્રથમ દાવમાં ભારતીય બેટ્સમેને 51 બોલમાં 12 ચોગ્ગા અને 2 છગ્ગાની મદદથી 72 રન બનાવ્યા હતા. આ સિવાય બીજી ઈનિંગમાં જયસ્વાલે 45 બોલમાં 7 ચોગ્ગા અને 1 છગ્ગાની મદદથી 51 રન બનાવ્યા હતા.
