IND vs SA: સેન્ચુરિયનમાં કેવો છે ભારતનો રેકોર્ડ? જુની ભુલ સુધારશે સૂર્યકુમાર!

ભારત અને દક્ષિણ આફ્રિકા વચ્ચે સિરીઝની ત્રીજી T20 મેચ સેન્ચુરિયનના સુપરસ્પોર્ટ પાર્કમાં રમાશે. પ્રથમ T20માં શાનદાર જીત બાદ સૂર્યકુમાર એન્ડ કંપનીને બીજી મેચમાં હારનો સામનો કરવો પડ્યો હતો. ટીમ ઈન્ડિયાના બેટ્સમેનો આસાનીથી દક્ષિણ આફ્રિકાના બોલરોનો શિકાર થઈ ગયા હતા. જો કે ત્રીજી મેચમાં ભારતીય ટીમની નજર મજબૂત વાપસી પર રહેશે. બીજી તરફ, પ્રોટીઝ ટીમ સેન્ચુરિયનમાં પણ છેલ્લી મેચના પોતાના જોરદાર પ્રદર્શનનું પુનરાવર્તન કરવાના ઈરાદા સાથે મેદાનમાં ઉતરશે.

કેવો છે સેન્ચુરિયનમાં ભારતનો રેકોર્ડ?

સેન્ચુરિયન મેદાન પર ભારતીય ટીમે અત્યાર સુધી માત્ર એક જ T20 ઈન્ટરનેશનલ મેચ રમી છે. બંને ટીમો વચ્ચે આ મેચ વર્ષ 2018માં રમાઈ હતી. પ્રથમ બેટિંગ કરતા ટીમ ઈન્ડિયાએ સ્કોર બોર્ડ પર 4 વિકેટ ગુમાવીને 188 રનનો મોટો સ્કોર બનાવ્યો હતો. ટીમ વતી મનીષ પાંડેએ 48 બોલમાં 79 રનની જોરદાર ઇનિંગ રમી હતી, જ્યારે એમએસ ધોનીએ માત્ર 28 બોલમાં 52 રન બનાવ્યા હતા. જોકે, દક્ષિણ આફ્રિકાએ 8 બોલ બાકી રહેતા 189 રનનો લક્ષ્યાંક હાંસલ કરી લીધો હતો. પ્રોટીઝ ટીમ વતી હેનરિક ક્લાસને વિસ્ફોટક બેટિંગ કરી અને 30 બોલમાં 69 રનની શાનદાર ઇનિંગ રમી, જ્યારે પોલ ડ્યુમિનીએ 64 રનનું યોગદાન આપ્યું. દક્ષિણ આફ્રિકાએ આ મેચ આસાનીથી 6 વિકેટે જીતી લીધી હતી.

દક્ષિણ આફ્રિકાને પસંદ નથી સેન્ચુરિયન

સાઉથ આફ્રિકાને પણ ક્રિકેટના સૌથી ટૂંકા ફોર્મેટમાં સેન્ચુરિયનનું સુપરસ્પોર્ટ પાર્ક મેદાન વધુ પસંદ નથી. ટીમે આ મેદાન પર અત્યાર સુધીમાં કુલ 14 T20 મેચ રમી છે, જેમાંથી ટીમ માત્ર 6 મેચ જીતી શકી છે. આ સાથે જ યજમાન ટીમને 8 મેચમાં હારનો સામનો કરવો પડ્યો હતો. જો કે, આ મેદાન પર રમાયેલી છેલ્લી મેચમાં દક્ષિણ આફ્રિકાના બેટ્સમેનોએ જોરદાર ધૂમ મચાવી હતી. વેસ્ટ ઈન્ડિઝ સામે રમતી વખતે પ્રોટીઝ ટીમે 259 રનના લક્ષ્યાંકનો પીછો કર્યો હતો.