IND VS SL: શ્રેયસ અય્યરની તોફાની ઇનિંગ, તોડ્યો સૌરવ ગાંગુલીનો રેકોર્ડ

• આજે ભારત અને શ્રીલંકા વચ્ચે મેચ
  
• શ્રેયસ અય્યરે વનડેમાં 2000 રન પૂરા કર્યા
• શ્રેયસ અય્યરે 106 મીટરની સિક્સ ફટકારી

ICC વર્લ્ડકપની 33મી મેચ ભારત અને શ્રીલંકા વચ્ચે રમાઈ રહી છે. શ્રેયસ અય્યરે આ મેચમાં 82 રનની તોફાની ઇનિંગ રમીને ઘણા રેકોર્ડ બનાવ્યા છે. પ્રથમ, અય્યરે આ વર્લ્ડ કપમાં સૌથી લાંબી સિક્સ ફટકારવાનો રેકોર્ડ બનાવ્યો હતો. આ પછી તેણે વધુ એક મોટો રેકોર્ડ તોડ્યો અને સૌરવ ગાંગુલી અને નવજોત સિદ્ધુને પાછળ છોડી દીધા હતા.

અય્યરે 106 મીટરની સિક્સ ફટકારી

શ્રેયસ અય્યરે શ્રીલંકા સામે માત્ર 56 બોલમાં 82 રનની ઇનિંગ રમી હતી. આ ઇનિંગ દરમિયાન અય્યરે 3 ફોર અને 6 ગગનચુંબી સિક્સ ફટકારી હતી. આ તોફાની ઇનિંગ્સને કારણે શ્રેયસ અય્યર ODI ક્રિકેટમાં સૌથી ઝડપી 2000 રન બનાવનાર ત્રીજો બેટ્સમેન બની ગયો છે. શ્રેયસ અય્યરે આ સિદ્ધી 54 મેચમાં 49 ઇનિંગ રમીને મેળવી હતી. આ દરમિયાન તેણે 3 સદી અને 16 ફિફ્ટી ફટકારી છે. અય્યરે આ મામલે સૌરવ ગાંગુલી અને નવજોત સિદ્ધુ જેવા દિગ્ગજ બેટ્સમેનોને પણ પાછળ છોડી દીધા છે. આ ઈનિંગ ઐયરની વર્લ્ડકપમાં સર્વશ્રેષ્ઠ ઈનિંગ્સ છે. આજે તેણે આ વર્લ્ડકપની બીજી ફિફ્ટી ફટકારી છે.

શ્રીલંકાનો ટાર્ગેટ 358

ભારતે શ્રીલંકા સામે 357 રન બનાવ્યા છે. આવી સ્થિતિમાં શ્રીલંકાને આ મેચ જીતવા માટે 358 રન બનાવવાની જરૂર છે. શ્રીલંકા માટે આ જીત આસાન નહીં હોય. ભારતના માત્ર બેટ્સમેન જ નહીં બોલરો પણ શાનદાર ફોર્મમાં છે. ફાસ્ટ બોલર મોહમ્મદ શમી અને જસપ્રીત બુમરાહ વર્લ્ડ કપમાં સતત ચમકી રહ્યા છે. આવી સ્થિતિમાં ભારતને આ મેચ જીતવામાં કોઈ મુશ્કેલીનો સામનો કરવો ન પડે. જોકે, ભારતીય ચાહકોને એ વાતનું દુઃખ હશે કે આજે ત્રણ ભારતીય બેટ્સમેન સદી ફટકારવામાં નિષ્ફળ રહ્યા છે. ત્રણેય ખેલાડીઓ વિરાટ કોહલી, શુભમન ગિલ અને શ્રેયસ અય્યર આજે 80થી વધુના સ્કોર સાથે પેવેલિયન પરત ફર્યા છે.