- ઝિમ્બાબ્વેએ ભારતને 13 રનથી હરાવ્યું છે
- 2024માં ટી20 ફોર્મેટમાં ભારતની આ પ્રથમ હાર છે
- મેચમાં ભારતની બેટિંગ ખરાબ રીતે ફ્લોપ રહી હતી
ઝિમ્બાબ્વેએ પ્રથમ ટી20 મેચમાં ભારતને 13 રને હરાવ્યું છે. ભારતીય ટીમના 8 બેટ્સમેન રનના મામલામાં બે આંકડાને પણ ટચ કરી શક્યા નથી. ઝિમ્બાબ્વેએ પહેલા રમતા 115 રન બનાવ્યા હતા, પરંતુ જ્યારે ભારત લક્ષ્યનો પીછો કરવા આવ્યો ત્યારે અડધીથી વધુ ટીમ 50 રનમાં જ પેવેલિયન પરત ફરી ગઈ હતી. એક સમયે ભારતનો સ્કોર 6 વિકેટે 47 રન હતો. આવેશ ખાન અને વોશિંગ્ટન સુંદરની 23 રનની નાની પરંતુ મહત્વપૂર્ણ ભાગીદારીએ ટીમ ઈન્ડિયાની આશા જગાવી હતી, પરંતુ ઝિમ્બાબ્વેની ટીમ અલગ મૂડમાં જોવા મળી હતી. 2024માં ટી20 ક્રિકેટમાં ભારતની આ પહેલી હાર છે.
ભારતની શરમજનક હાર
ભારતને જીતવા માટે 116 રન બનાવવાના હતા, પરંતુ પહેલી ઓવરમાં જ વિકેટ પડવાની શરૂઆત થઈ ગઈ હતી. અભિષેક શર્મા પોતાની ડેબ્યૂ મેચમાં શૂન્ય રને આઉટ થયો હતો. વિકેટો પડવાની સ્થિતિ એવી રીતે શરૂ થઈ કે એક સમયે ભારતનો સ્કોર 6 વિકેટે 47 રન હતો. ઋતુરાજ ગાયકવાડે 7 રન બનાવ્યા હતા, જ્યારે રિયાન પરાગ પણ પોતાની ડેબ્યુ મેચમાં માત્ર 2 રન બનાવીને પેવેલિયન પરત ફર્યો હતો. આ જ મેચમાં ધ્રુવ જુરેલે ટી20માં ડેબ્યૂ કર્યું હતું, પરંતુ તેના બેટમાંથી માત્ર 7 રન જ નીકળ્યા હતા. ટીમ ઈન્ડિયાને રિંકુ સિંહ પર ઘણો વિશ્વાસ હતો, જે પોતાનું ખાતું પણ ખોલાવી શક્યો ન હતો. એક તરફ ભારતીય બેટ્સમેનો પોતાની વિકેટો ગુમાવી રહ્યા હતા, તો બીજી તરફ કેપ્ટન શુભમન ગિલ મક્કમ રીતે ઉભો હતો. ગિલે 25 બોલમાં 31 રન બનાવ્યા હતા, પરંતુ સિકંદર રઝાએ તેને ક્લીન બોલ્ડ કર્યો હતો.
મેચનો હીરો વોશિંગ્ટન સુંદર
વોશિંગ્ટન સુંદર 7મા સ્થાને બેટિંગ કરવા આવ્યો હતો અને ત્યાં સુધીમાં ટીમ મુશ્કેલીમાં મુકાઈ ગઈ હતી. ટીમે 47 રનમાં 6 વિકેટ ગુમાવી દીધી હતી ત્યારે સુંદર બેટિંગ કરવા આવ્યો હતો. તેણે આ પરિસ્થિતિમાં 30 બોલમાં 30 રનની ઈનિંગ રમીને મેચમાં રોમાંચ વધાર્યો હતો. ભારતને જીતવા માટે છેલ્લી 2 ઓવરમાં 18 રન બનાવવાના હતા, પરંતુ માત્ર એક જ વિકેટ બાકી હોવાથી સુંદરે એક પણ રન ન લેવાનો નિર્ણય કર્યો. અંતે ભારતને 12 રને હારનો સામનો કરવો પડ્યો હતો.
2024માં ભારતની પહેલી હાર
ટીમ ઈન્ડિયાને વર્ષ 2024માં અત્યાર સુધી ટી-20 મેચમાં કોઈ હારનો સામનો કરવો પડ્યો નથી. ટી20 વર્લ્ડકપમાં ભારત અજેય રહ્યું અને વિશ્વ ચેમ્પિયન બન્યું. 2024ની વાત કરીએ તો ટી20 વર્લ્ડકપમાં અજેય રહેવા સિવાય ભારતીય ટીમે અફઘાનિસ્તાનને પણ ક્લીન સ્વીપ કરી છે. પરંતુ ઝિમ્બાબ્વે હવે 2024માં ટી20 મેચમાં ટીમ ઈન્ડિયાને હરાવનારી પહેલી ટીમ બની ગઈ છે.
