- ટીમ ઈન્ડિયાએ ઈંગ્લેન્ડને 434 રનથી હરાવ્યું
- પાંચ ટેસ્ટ મેચની સિરીઝમાં 2-1થી આગળ
- યશસ્વીને બેવડી સદી, જાડેજાની પાંચ વિકેટ
રાજકોટ ટેસ્ટમાં ભારતે ઈંગ્લેન્ડને 434 રનના વિશાળ અંતરથી હરાવ્યું છે. ઈંગ્લેન્ડને જીતવા માટે 557 રનનો વિશાળ ટાર્ગેટ હતો, પરંતુ બેન સ્ટોક્સના નેતૃત્વમાં ઈંગ્લેન્ડની ટીમ માત્ર 122 રન સુધી જ સિમિત રહી ગઈ હતી. જો કે આ જીત બાદ ટીમ ઈન્ડિયા 5 ટેસ્ટ મેચની સિરીઝમાં 2-1થી આગળ છે. ઈંગ્લેન્ડના છ બેટ્સમેન બીજા દાવમાં ડબલ ડિજીટને સ્પર્શી શક્યા ન હતા. માર્ક વૂડે સૌથી વધુ 33 રનનું યોગદાન આપ્યું હતું. આ સિવાય જેક ક્રાઉલી, બેન ડકેટ, ઓલી પોપ, જો રૂટ, જોની બેરસ્ટો, બેન સ્ટોક્સ અને બેન ફોક્સ જેવા બેટ્સમેનોએ નિરાશ કર્યા હતા.
ભારત તરફથી રવિન્દ્ર જાડેજા સૌથી સફળ બોલર રહ્યો હતો. રવિન્દ્ર જાડેજાએ 12.4 ઓવરમાં 41 રન આપીને 5 બેટ્સમેનોને પોતાનો શિકાર બનાવ્યા હતા. કુલદીપ યાદવને 2 સફળતા મળી. આ સિવાય રવિ અશ્વિન અને જસપ્રિત બુમરાહે 1-1 વિકેટ લીધી હતી.
ભારતીય બોલરોએ કરી કમાલ
આ પહેલા ભારતે તેનો બીજો દાવ 430 રન પર ડિકલેર કર્યો હતો. આ રીતે અંગ્રેજોને જીતવા માટે 557 રનનો ટાર્ગેટ હતો. ઈંગ્લેન્ડની શરૂઆત ખૂબ જ ખરાબ રહી હતી. ઓપનર બેન ડકેટ અને જેક ક્રાઉલી 18 રન બનાવીને પેવેલિયન ગયા હતા. આ પછી પણ વિકેટો પડવાનો સિલસિલો ચાલુ રહ્યો. ઈંગ્લેન્ડના 7 બેટ્સમેન 50 રનના સ્કોર પર આઉટ થઈ ગયા હતા. ભારતીય બોલરો સામે ઇંગ્લિશ બેટ્સમેનો લાચાર દેખાતા હતા. આથી ઈંગ્લેન્ડનો બીજો દાવ માત્ર 122 રનમાં સમેટાઈ ગયો હતો.
રાજકોટ ટેસ્ટમાં શું થયું?
આ પહેલા ભારતીય કેપ્ટન રોહિત શર્માએ ટોસ જીતીને બેટિંગ કરવાનો નિર્ણય કર્યો હતો. રોહિત શર્મા અને રવિન્દ્ર જાડેજાની સદીની મદદથી ભારતે પ્રથમ દાવમાં 445 રન બનાવ્યા હતા. જેના જવાબમાં ઈંગ્લેન્ડનો પ્રથમ દાવ 319 રનમાં સમેટાઈ ગયો હતો. ઈંગ્લેન્ડ તરફથી બેન ડકેટે 153 રનની ઈનિંગ રમી હતી. તે જ સમયે, ભારતે 4 વિકેટે 430 રન બનાવીને બીજી ઇનિંગ ડિકલેર કરી હતી. યશસ્વી જયસ્વાલે બીજા દાવમાં અણનમ બેવડી સદી ફટકારી હતી. આ સિવાય શુભમન ગિલે 91 રન અને સરફરાઝ ખાને 68 રનનું યોગદાન આપ્યું હતું.
