- આજે વર્લ્ડ ચેમ્પિયનશિપ ઓફ લિજેન્ડ્સની ફાઈનલ
- ભારત અને પાકિસ્તાન ચેમ્પિયનસ વચ્ચે રમાશે મેચ
- ઈંગ્લેન્ડના બર્મિંગહામ સ્ટેડિયમમાં રમાશે ફાઈનલ
આજે વર્લ્ડ ચેમ્પિયનશિપ ઓફ લિજેન્ડ્સ 2024ની ફાઈનલ ભારત ચેમ્પિયનસ અને પાકિસ્તાન ચેમ્પિયનસ વચ્ચે રમાશે. આ મેચ ઈંગ્લેન્ડના બર્મિંગહામ સ્ટેડિયમમાં ભારતીય સમય અનુસાર રાત્રે 9:00 વાગ્યાથી શરૂ થશે. આ T20 લીગની ફાઈનલ T20 વર્લ્ડકપ 2007ના ઈતિહાસને પુનરાવર્તિત કરી શકે છે કારણ કે બંને ટીમો પાસે ઘણા એવા ખેલાડીઓ છે જેઓ T20 વર્લ્ડકપ 2007ની ફાઈનલનો પણ ભાગ હતા.
વર્લ્ડ ચેમ્પિયનશિપ ઓફ લિજેન્ડ્સ 2024માં ભારત ચેમ્પિયન અને પાકિસ્તાન ચેમ્પિયનની ટીમોએ ફાઇનલમાં જગ્યા બનાવી લીધી છે. ઈન્ડિયા ચેમ્પિયન્સે સેમીફાઈનલમાં ઓસ્ટ્રેલિયાને હરાવ્યું હતું અને પાકિસ્તાન ચેમ્પિયન્સે સેમીફાઈનલમાં વેસ્ટ ઈન્ડિઝને હરાવીને ફાઈનલ મેચમાં જગ્યા મેળવી હતી.
શું ઇતિહાસનું પુનરાવર્તન થશે?
T20 વર્લ્ડકપ 2007માં ભારત અને પાકિસ્તાનની ટીમો ફાઇનલમાં આમને-સામને હતી. જોહાનિસબર્ગમાં રમાયેલી તે ફાઈનલ મેચમાં ટીમ ઈન્ડિયાએ 5 રનથી જીત મેળવીને ટ્રોફી પોતાના નામે કરી હતી. મેચમાં ઈરફાન પઠાણ 'પ્લેયર ઓફ ધ મેચ' રહ્યો હતો. આવી સ્થિતિમાં, આ વખતે પણ ઇરફાન પઠાણ સહિત ઘણા ખેલાડીઓ ભારત ચેમ્પિયનનો ભાગ છે, જેણે 2007માં પાકિસ્તાન સામે ફાઇનલ મેચ રમી હતી. હવે એ જોવાનું રસપ્રદ રહેશે કે 2024માં યોજાનારી લીગની ફાઇનલમાં કઇ ટીમ કઇ ટીમ પર વિજય મેળવે છે.
લીગ મેચમાં ભારતની થઈ હતી હાર
વર્લ્ડ ચેમ્પિયનશિપ ઓફ લિજેન્ડ્સ 2024ની લીગમાં ભારત ચેમ્પિયન અને પાકિસ્તાન ચેમ્પિયન વચ્ચે 6 જુલાઈના રોજ મેચ રમાઈ હતી. આ મેચમાં પાકિસ્તાન ચેમ્પિયન્સે ભારતને કારમી હાર આપી હતી. મેચમાં પ્રથમ બેટિંગ કરતા પાકિસ્તાન ચેમ્પિયન્સે 20 ઓવરમાં 243/4 રન બનાવ્યા હતા. ત્યારબાદ લક્ષ્યનો પીછો કરતી વખતે ઈન્ડિયા ચેમ્પિયન્સ 175/9 રન જ બનાવી શકી હતી. આ રીતે ભારતીય ચેમ્પિયન્સને 68 રનથી મોટી હારનો સામનો કરવો પડ્યો હતો. આવી સ્થિતિમાં, ટાઈટલ મેચમાં કઈ ટીમ કોના પર વિજય મેળવે છે તે જોવું રસપ્રદ રહેશે.
