- ભારત અને ઈંગ્લેન્ડ વચ્ચે રાંચીમાં ચોથી ટેસ્ટ
- ચોથા દિવસે રોહિત-એન્ડરસન વચ્ચે બોલાચાલી
- ભારતીય ટીમ પર લાગી શકે છે 5 રનની પેનલ્ટી
ભારત અને ઈંગ્લેન્ડ વચ્ચે રમાઈ રહેલી રાંચી ટેસ્ટ મેચ દરમિયાન ભારતીય કેપ્ટન રોહિત શર્મા અને ઈંગ્લેન્ડના દિગ્ગજ ખેલાડી જેમ્સ એન્ડરસન વચ્ચે ઉગ્ર બોલાચાલી થઈ હતી. આ ઘટના રાંચી ટેસ્ટ મેચના ચોથા દિવસે બની હતી. મેચના ચોથા દિવસે ભારતીય ટીમ બેટિંગ કરવા મેદાનમાં ઉતરી હતી. મેચ શરૂ થયાના થોડા સમય બાદ રોહિત શર્મા અને એન્ડરસન વચ્ચે બોલાચાલી થઈ હતી. વાસ્તવમાં, આ ઘટના ત્યારે બની જ્યારે રોહિત શર્મા અને યશસ્વી જયસ્વાલ એન્ડરસનના બોલ પર સિંગલ્સ લઈ રહ્યા હતા.
શું છે સમગ્ર મામલો
મેચના ચોથા દિવસે રોહિત શર્માએ જેમ્સ એન્ડરસનના બોલ પર શાનદાર સિક્સર ફટકારી હતી. ઈંગ્લેન્ડના કેપ્ટન બેન સ્ટોક્સ પણ આ સિક્સ જોઈને આશ્ચર્યચકિત થઈ ગયા હતા. રોહિતના સિક્સ પર સ્ટોક્સની પ્રતિક્રિયા વાયરલ થઈ રહી છે. આ દરમિયાન જ્યારે રોહિત અને યશસ્વીએ એન્ડરસનના એક બોલ પર સિંગલ લીધો ત્યારે કેપ્ટન અને એન્ડરસન વચ્ચે બોલાચાલી થઈ હતી. એન્ડરસનના બોલ પર યશસ્વી જયસ્વાલ સ્ટ્રાઈક પર હતો. આ સમય દરમિયાન, સિંગલ્સ લેતી વખતે રોહિત અને જયસ્વાલ વચ્ચે થોડી મૂંઝવણ પણ ઊભી થઈ. જોકે આખરે બંને ખેલાડીઓએ સિંગલ્સ લીધો. સિંગલ લીધા પછી, એન્ડરસન અને રોહિત વચ્ચે કંઈક બોલચાલી થઈ હતી. રોહિત શર્માને જોઈને એન્ડરસને કંઈક કહેવાનું શરૂ કર્યું, તો રોહિત શર્માએ પણ જવાબ આપ્યો હતો.
ભારતીય ટીમ પર લાગી શકે છે દંડ
બંને વચ્ચે શું ચર્ચા થઈ રહી હતી તે માઈકમાં રેકોર્ડ થઈ શકી ન હતી, પરંતુ જે રીતે બંને ખેલાડીઓ એકબીજાની સામે જોઈ રહ્યા હતા તે જોઈને લાગી રહ્યું હતું કે કોઈ વિવાદ થયો છે. આ ઘટના અંગે કોમેન્ટેટરનું અનુમાન છે કે કદાચ એન્ડરસન રોહિત શર્માને કહેતો હશે કે તું પિચ વચ્ચે કેમ દોડી રહ્યો છે, બાજુમાં દોડ. નોન-સ્ટ્રાઈકર બેટ્સમેન માટે પિચ પર દોડીને રન બનાવવાની સખત મનાઈ છે. જો કોઈ ખેલાડી આવું કરે છે તો તેની ટીમ પર 5 રનની પેનલ્ટી પણ લગાવવામાં આવે છે. કોમેન્ટેટરે એમ પણ કહ્યું કે જો રોહિત શર્માએ પિચ પર દોડીને રન બનાવ્યા છે તો અમ્પાયર તેના પર દંડ પણ લગાવી શકે છે. શક્ય છે કે આ બાબતની તપાસ કરવામાં આવે અને જો રોહિત દોષિત ઠરશે તો ભારતીય ટીમ પર 5 રનની પેનલ્ટી લગાવવામાં આવશે.
