India vs Pakistan: કોહલી કે બાબર, કોણ છે અસલી કિંગ? જાણો આંકડા

• T20 વર્લ્ડકપ 2024માં બંને ટીમો 9 જૂને ભારત-પાકિસ્તાન ટકરાશે
  
• આ મેચમાં તમામની નજર વિરાટ કોહલી અને બાબર આઝમ પર રહેશે
• કોહલી-બાબરની ગણતરી વર્તમાન સમયના શ્રેષ્ઠ બેટ્સમેનોમાં થાય છે

સમગ્ર ક્રિકેટ જગત જેની રાહ જોઈ રહ્યું હતું તે મેચ હવે ખૂબ જ નજીક આવી ગઇ છે. આ મેચને “મહામુકાબાલા” નામ આપવામાં આવ્યું છે, એ છે ભારત અને પાકિસ્તાન વચ્ચેની મેચ. T20 વર્લ્ડકપ 2024માં બંને ટીમો 9 જૂને અમેરિકાના ન્યુયોર્કના નાસાઉ ઈન્ટરનેશનલ ક્રિકેટ સ્ટેડિયમમાં સામસામે ટકરાશે. આ મેચમાં તમામની નજર વિરાટ કોહલી અને બાબર આઝમ પર રહેશે. બંને પોતપોતાની ટીમના મુખ્ય બેટ્સમેન છે.

આ બંનેની ગણતરી વર્તમાન સમયના શ્રેષ્ઠ બેટ્સમેનોમાં થાય છે. જો વિરાટ કોહલી વહેલો આઉટ થઈ જશે તો તે ભારત માટે મોટો ફટકો હશે. પાકિસ્તાનની બેટિંગ બાબરની આસપાસ ફરે છે. જો તે આઉટ થાય છે તો પાકિસ્તાન ઘણું નબળું પડી જાય છે. તેથી આ મેચ પહેલા આ બંનેના રેકોર્ડ શું કહે છે તે જાણવું જરૂરી બની જાય છે. અમે તમને વિરાટ કોહલીના પાકિસ્તાન વિરુદ્ધ અને બાબર આઝમના ભારત વિરુદ્ધના રેકોર્ડ વિશે જણાવીશું.

પાકિસ્તાન સામે વિરાટનો રેકોર્ડ

ભારત અને પાકિસ્તાન વચ્ચે છેલ્લી T20 મેચ રમાઈ ત્યારે વિરાટ કોહલીએ રમેલી ઈનિંગને કોઈ ભૂલી શકે તેમ નથી. તે મેચમાં વિરાટે પાકિસ્તાન પાસેથી જીત છીનવી લીધી હતી. પાકિસ્તાન સામે વિરાટનો ટી20 રેકોર્ડ શાનદાર રહ્યો છે. તેણે T20 ઈન્ટરનેશનલમાં પાકિસ્તાન સામે 10 મેચ રમી છે અને 81.33ની એવરેજથી 488 રન બનાવ્યા છે. આ સમયગાળા દરમિયાન તેનો સ્ટ્રાઈક રેટ 123.85 રહ્યો છે. તેણે પોતાના બેટથી પાંચ અડધી સદી પણ ફટકારી છે.

બાબર નિષ્ફળ ગયો

જો બાબરનું પ્રદર્શન કોહલીની સરખામણીમાં જોવામાં આવે તો તે એકદમ નિરાશાજનક છે. બાબર ટી20 ઈન્ટરનેશનલમાં ભારત સામે નિષ્ફળ સાબિત થયો છે. તેણે ભારત સામે ચાર ટી20 મેચ રમી છે જેમાં તેણે માત્ર 92 રન જ બનાવ્યા છે. તેની એવરેજ કોહલી કરતા ઘણી ઓછી છે. ભારત સામે બાબરની એવરેજ 30.66 છે જ્યારે સ્ટ્રાઇકના મામલે તે વિરાટ કરતા થોડો આગળ છે. ભારત સામે ટી20માં બાબરનો સ્ટ્રાઈક રેટ 127.77 છે. બાબરે ભારત સામે માત્ર એક અડધી સદી ફટકારી છે.