- શ્રીલંકા પ્રવાસ માટે ટીમ ઈન્ડિયાની થઈ જાહેરાત
- રોહિત શર્મા અને વિરાટ કોહલીની ટીમમાં વાપસી
- રવિન્દ્ર જાડેજાની ટીમમાં અવગણના કરવામાં આવી
શ્રીલંકા પ્રવાસ માટે ટીમ ઈન્ડિયાની જાહેરાત થતાં જ એવું જોવા મળ્યું હતું કે મેચ વિજેતા ખેલાડીનું નામ ટીમમાં નથી. આ જોઈને ચાહકો પણ આશ્ચર્યચકિત થઈ ગયા કે આ ખેલાડીને ટીમ ઈન્ડિયામાં કેમ પસંદ કરવામાં આવ્યો નથી. હવે આ ખેલાડીની કારકિર્દી પર સંકટના વાદળો ઘેરાઈ રહ્યા છે. આ ખેલાડીને લઈને BCCI દ્વારા એક મોટું અપડેટ આપવામાં આવ્યું છે. ગૌતમ ગંભીરના નેતૃત્વમાં પસંદગીકારોએ આ સ્ટાર ઓલરાઉન્ડરનો વિકલ્પ શોધવાનું શરૂ કરી દીધું છે. આ અંગે પસંદગીકારોએ શ્રીલંકા પ્રવાસ દરમિયાન બે સ્પિન બોલિંગ ઓલરાઉન્ડરો પર વિશ્વાસ વ્યક્ત કર્યો છે.
શું દિગ્ગજ ઓલરાઉન્ડરની કારકિર્દી થશે ખતમ
રવિન્દ્ર જાડેજાને શ્રીલંકા પ્રવાસની વનડે સિરીઝમાં સ્થાન આપવામાં આવ્યું ન હતું. કોહલી અને રોહિત પરત ફર્યા હતા પરંતુ પસંદગીકારો દ્વારા જાડેજાની અવગણના કરવામાં આવી હતી. એક રિપોર્ટ અનુસાર, BCCIના સૂત્રોએ જણાવ્યું કે ICC ચેમ્પિયન્સ ટ્રોફી પહેલા ભારત પાસે 6 ODI મેચ બાકી છે. જેમાંથી ટીમ ઈન્ડિયાને હવે શ્રીલંકા સાથે ત્રણ મેચ રમવાની છે.
આવી સ્થિતિમાં, જાડેજાના વિકલ્પની શોધમાં પસંદગીકારો અક્ષર પટેલ અને વોશિંગ્ટન સુંદરને મહત્તમ તક આપવા માંગે છે. તેથી હવે રવિન્દ્ર જાડેજાની વનડે કારકિર્દી જોખમમાં છે. જો રવીન્દ્ર જાડેજાના ODI કરિયરની વાત કરીએ તો જાડેજાએ ટીમ ઈન્ડિયા માટે 197 ODI મેચ રમી છે. જેમાં તેણે બોલિંગ દરમિયાન 220 વિકેટ પોતાના નામે નોંધાવી છે. આ સિવાય જાડેજાએ પણ બેટિંગ કરતા 2756 રન બનાવ્યા છે.
T20 ઈન્ટરનેશનલમાંથી લઈ લીધી નિવૃત્તિ
રવિન્દ્ર જાડેજા T20 વર્લ્ડકપ 2024માં રમતા જોવા મળ્યો હતો. જાડેજા માટે આ ટુર્નામેન્ટ કંઈ ખાસ ન હતી. ટીમ ઈન્ડિયા ચેમ્પિયન બન્યા બાદ રોહિત શર્મા અને વિરાટ કોહલીએ T20 ઈન્ટરનેશનલ ક્રિકેટમાંથી સંન્યાસ લેવાની જાહેરાત કરી હતી, ત્યારબાદ જાડેજાએ પણ T20 ક્રિકેટને અલવિદા કહી દીધું હતું.
