- T20 વર્લ્ડકપ 2024 2 જૂનથી શરૂ થશે
- ભારતીય ટીમ ટૂર્નામેન્ટ માટે અમેરિકા પહોંચી
- ભારતીય ટીમે 2007માં T20 વર્લ્ડકપ જીત્યો
T20 વર્લ્ડકપ 2024 2 જૂનથી શરૂ થશે. ભારતીય ટીમ ટૂર્નામેન્ટ માટે અમેરિકા પહોંચી ચૂકી છે અને ટીમે પ્રેક્ટિસ પણ શરૂ કરી દીધી છે. ભારત અને બાંગ્લાદેશ વચ્ચે 1 જૂને પ્રેક્ટિસ મેચ રમાશે. આ પછી ટીમ ઈન્ડિયા 5 જૂને આયર્લેન્ડ સામે ટકરાશે. મેન ઇન બ્લુ 9 જૂને પાકિસ્તાન સાથે ટકરાશે. T20 વર્લ્ડકપની અત્યાર સુધી 8 સીઝન રમાઈ છે. ટીમ ઈન્ડિયાએ 2007માં પ્રથમ અને છેલ્લી વખત T20 વર્લ્ડકપનો ખિતાબ જીત્યો હતો.
ભારતે ડેબ્યૂ સીઝન જીતી હતી
T20 વર્લ્ડકપ 2007માં શરૂ થયો હતો. મહેન્દ્ર સિંહ ધોનીની કપ્તાની હેઠળની યુવા ભારતીય ટીમે ડેબ્યૂ સિઝનમાં જ ખિતાબ કબજે કર્યો હતો. ભારતીય ટીમે ફાઇનલમાં પાકિસ્તાનને હરાવ્યું હતું. બીજી જ સિઝન 2009માં ભારતીય ટીમ સુપર-8માં પહોંચી. આ સિઝનમાં પાકિસ્તાને ટાઈટલ જીત્યું હતું. T20 વર્લ્ડકપ 2010માં પણ ટીમ ઈન્ડિયાએ સુપર-8 સુધીનો પ્રવાસ ખેડ્યો હતો.
વેસ્ટ ઈન્ડિઝ સામે હારી ગઈ હતી
T20 વર્લ્ડકપ 2012માં ટીમ ઈન્ડિયા માત્ર સુપર-8માં જ પહોંચી શકી હતી. આ પછી 2014માં ટૂર્નામેન્ટનું આયોજન કરવામાં આવ્યું હતું. મેન ઇન બ્લુની 5મી સિઝનમાં શાનદાર સફર હતી અને ટીમે ફાઇનલમાં જગ્યા બનાવી હતી. જોકે નિર્ણાયક મેચમાં શ્રીલંકાએ ભારતને 6 વિકેટે હરાવ્યું હતું. T20 વર્લ્ડકપની છઠ્ઠી સિઝનમાં ટીમ ઈન્ડિયા સેમીફાઈનલમાં જગ્યા બનાવવામાં સફળ રહી હતી. બીજી સેમીફાઈનલમાં વેસ્ટ ઈન્ડીઝે ભારતને 7 વિકેટે હરાવ્યું અને તેનું વર્લ્ડકપ જીતવાનું સપનું ચકનાચૂર થઈ ગયું હતું.
T20 વર્લ્ડકપ 2021માં શરમજનક પ્રદર્શન
T20 વર્લ્ડકપ 2021માં ભારતીય ટીમનું પ્રદર્શન ઘણું શરમજનક હતું અને ટીમ સેમીફાઈનલમાં પણ પહોંચી શકી ન હતી. આ સિઝનમાં પાકિસ્તાને ભારતને 10 વિકેટે હરાવ્યું હતું. T20 વર્લ્ડ કપના ઈતિહાસમાં આ પહેલીવાર હતું જ્યારે પાકિસ્તાને ભારતને હરાવ્યું હોય. આ પછી ભારતીય ટીમ T20 વર્લ્ડકપ 2022માં સેમિફાઇનલમાં પહોંચી હતી. બીજી સેમીફાઈનલમાં ઈંગ્લેન્ડે ભારતને હરાવીને ટ્રોફીની રેસમાંથી બહાર ફેંકી દીધું હતું.
