IPL: શ્રેયસ ઐયરે દિગ્ગજ ફૂટબોલરની જેમ કરી જીતની ઉજવણી, વીડિયો વાયરલ

• IPL 2024નો અંત કોલકાતા નાઈટ રાઈડર્સની જીત સાથે થયો
  
• શ્રેયસ ઐયરની આગેવાની હેઠળ KKRએ ઐતિહાસિક જીત નોંધાવી
• KKRએ 10 વર્ષ બાદ ફરીથી ટ્રોફી પર કબજો કર્યો

IPL 2024નો અંત કોલકાતા નાઈટ રાઈડર્સની જીત સાથે થયો. શ્રેયસ ઐયરની આગેવાની હેઠળની ટીમે રવિવારે સનરાઇઝર્સ હૈદરાબાદ સામે 8 વિકેટે ઐતિહાસિક જીત નોંધાવી હતી. મેચ બાદ ટીમના કેપ્ટને દિગ્ગજ ફૂટબોલર લિયોનેલ મેસ્સીની જેમ જીતની ઉજવણી કરી હતી. તેનો વીડિયો હવે સોશિયલ મીડિયા પર ખૂબ જ ઝડપથી વાયરલ થઈ રહ્યો છે.

KKR 8 વિકેટે જીત્યું

ટાઈટલ મેચમાં ટોસ જીતીને પ્રથમ બેટિંગ કરવા આવેલી સનરાઈઝર્સ હૈદરાબાદની ટીમ 18.3 ઓવરમાં 113 રનના સ્કોર પર ઓલઆઉટ થઈ ગઈ હતી. જવાબમાં કોલકાતાની ટીમે 10.3 ઓવરમાં બે વિકેટ ગુમાવીને 114 રન બનાવ્યા હતા અને 8 વિકેટે મેચ જીતી લીધી હતી. કોલકાતાએ અગાઉ 2014ની સિઝનમાં પંજાબ કિંગ્સને હરાવીને તેનું છેલ્લું ટાઇટલ જીત્યું હતું અને હવે 10 વર્ષ બાદ ટીમે ફરીથી ટ્રોફી પર કબજો કર્યો છે.

ઐયરે મેસ્સીની જેમ ઉજવણી કરી

કોલકાતાની જીત બાદ BCCIના પ્રમુખ રોજર બિન્ની અને સેક્રેટરી જય શાહે કેપ્ટન શ્રેયસ ઐયરેને ટ્રોફી સોંપી. આ પછી તેણે પોતાની ટીમ સાથે ઉજવણી કરી. ઐયરે દિગ્ગજ ફૂટબોલર લિયોનેલ મેસ્સીની જેમ જીતની ઉજવણી કરી હતી. હકીકતમાં, ડિસેમ્બર 2022માં આર્જેન્ટિનાએ ફિફા વર્લ્ડ કપ જીત્યા બાદ મેસીએ કતારમાં આવી જ રીતે ઉજવણી કરી હતી.

ટાઈટલ મેચ જીત્યા બાદ કેપ્ટને ટીમના વખાણ કર્યા

KKR માટે આ સિઝન શાનદાર રહી. 14માંથી 9 મેચ જીત્યા બાદ KKRના ખાતામાં 20 પોઈન્ટ થઈ ગયા હતા. ખિતાબ જીત્યા બાદ KKRના કેપ્ટન શ્રેયસ ઐયરે પોતાની ટીમના વખાણ કર્યા હતા. તેણે કહ્યું, "આ લાગણી વ્યક્ત કરવી મુશ્કેલ છે. પ્રતીક્ષા ઘણી લાંબી હતી, મેચ કરતાં પણ લાંબી હતી. આખી સિઝન અમારા માટે અદ્ભુત રહી. મારી પાસે અત્યારે શબ્દો નથી, આપણે પહેલાથી જ શાનદાર પ્રદર્શન કર્યું છે. આપણે આજે આગળ વધ્યા છીએ, પોતાની જાતને એક બીજાને ટેકો આપવાનું કહ્યું છે, પછી ભલે તે પરિસ્થિતિ ગમે તે હોય."