- ઈશાન કિશન લાંબા સમયથી ભારતીય ટીમની બહાર છે
- ગત વર્ષે સાઉથ આફ્રિકાનો પ્રવાસ અધવચ્ચે જ છોડી દીધો હતો
- ઈશાન બૂચી બાબુ ટૂર્નામેન્ટમાં ઝારખંડની કેપ્ટનશિપ કરશે
ટીમ ઈન્ડિયાના યુવા વિકેટકીપર બેટ્સમેન ઈશાન કિશન લાંબા સમયથી ભારતીય ટીમની બહાર છે.તેણે ગયા વર્ષે સાઉથ આફ્રિકાનો પ્રવાસ અધવચ્ચે જ છોડી દીધો હતો અને પાછો ફર્યો હતો, ત્યારબાદ તેને ટીમ ઈન્ડિયામાંથી બહાર કરી દેવામાં આવ્યો હતો. પરંતુ હવે ઈશાન કિશન ક્રિકેટના મેદાનમાં પરત ફરી રહ્યો છે, અહીંથી ઈશાનને ટીમ ઈન્ડિયા સુધી પહોંચવાનો રસ્તો મળશે.
ઈશાન કિશન આગામી બૂચી બાબુ ટૂર્નામેન્ટમાં ઝારખંડની કેપ્ટનશિપ કરતો જોવા મળી શકે છે. આ ડોમેસ્ટિક સીઝનમાં ઈશાન કિશાન શાનદાર પ્રદર્શન કરીને ટીમ ઈન્ડિયામાં પોતાની વાપસી કરી શકે છે. અગાઉ ઈશાનને ડોમેસ્ટિક ક્રિકેટની અવગણના કરીને ઘણું સહન કરવું પડ્યું હતું.
ઝારખંડ ટીમની કેપ્ટનશીપ કરશે
એક રિપોર્ટ અનુસાર, ઈશાન કિશન આગામી બૂચી બાબુ ટૂર્નામેન્ટમાં ઝારખંડની કેપ્ટનશિપ કરતો જોવા મળી શકે છે. રિપોર્ટ અનુસાર, ઝારખંડ સ્ટેટ ક્રિકેટ એસોસિએશન (JSCA)ને ભાગ લેવા માટે તેની રુચિ હોવાની જાણ કર્યા બાદ ઈશાન કિશનને ટીમમાં સામેલ કરવામાં આવ્યો છે. રિપોર્ટ અનુસાર, ઝારખંડ ક્રિકેટના એક અધિકારીએ જણાવ્યું કે ઈશાનને પૂછવામાં આવ્યું કે તે વાપસી ફરવા માટે તૈયાર છે કે નહીં. પ્રારંભિક યાદીમાં તેમનું નામ સામેલ નહોતું. કારણ કે તેમની સાથે આ બાબતે કોઈ ચર્ચા થઈ નથી.
ઈશાન સેન્ટ્રલ કોન્ટ્રાક્ટમાંથી બહાર છે
ક્રિકેટમાંથી બ્રેક લીધા બાદ સિલેક્ટરે ઈશાન કિશનને ડોમેસ્ટિક ક્રિકેટ રમવાની સલાહ આપી હતી, પરંતુ વિકેટકીપર બેટ્સમેને આ સલાહની અવગણના કરી અને છેલ્લી રણજી ટૂર્નામેન્ટ પણ ન રમી હતી. આ પછી ટીમ ઈન્ડિયામાંથી બહાર થવાની સાથે ઈશાનને બીસીસીઆઈના સેન્ટ્રલ કોન્ટ્રાક્ટમાંથી પણ બહાર કરી દેવામાં આવ્યો હતો. હવે કિશન પાસે ઘરેલુ ક્રિકેટમાં શાનદાર પ્રદર્શન કરીને ટીમ ઈન્ડિયામાં વાપસી કરવાની સુવર્ણ તક છે.
ક્યારે શરૂ થશે બુચી બાબુ ટુર્નામેન્ટ
બુચી બાબુ ટુર્નામેન્ટ 15 ઓગસ્ટથી શરૂ થશે. સેમી ફાઈનલ મેચ 2 સપ્ટેમ્બરથી અને ફાઈનલ 8 સપ્ટેમ્બરથી રમાશે. આ ચાર દિવસીય ક્રિકેટ ટુર્નામેન્ટ છે જેમાં 12 ટીમો ભાગ લે છે. આ ટીમોને ચાર ગ્રુપમાં વહેંચવામાં આવી છે. આ ટુર્નામેન્ટમાં, 10 ટીમો બહારના રાજ્યોની છે જ્યારે તમિલનાડુની બે ટીમો તેમાં રમે છે, તમિલનાડુ ક્રિકેટ એસોસિએશન પ્રેસિડેન્ટ ઈલેવન અને ટીએનસીએ ઈલેવન. આ સમગ્ર ટુર્નામેન્ટ તમિલનાડુમાં યોજાશે. આ મેચો નાથમ, કોઈમ્બતુર અને તિરુનેલવેલીમાં યોજાશે. આ ટુર્નામેન્ટ જીતનારી ટીમને 3 લાખ રૂપિયાનું રોકડ ઇનામ મળશે જ્યારે રનર અપ ટીમને 2 લાખ રૂપિયા મળશે. ઈશાન કિશન, સરફરાઝ ખાન, સૂર્યકુમાર યાદવ જેવા મોટા નામ આ ટૂર્નામેન્ટમાં રમતા જોવા મળશે.
