- બુમરાહને સોંપવામાં આવી હતી કેપ્ટનશીપ
- ODI વાઇસ કેપ્ટનશિપ માટે બુમરાહ-હાર્દિક વચ્ચે ટક્કર
- એશિયા કપ અને વર્લ્ડ કપમાં રોહિતની જગ્યા લઈ શકે છે બુમરાહ
જસપ્રીત બુમરાહે ટીમ ઈન્ડિયામાં વાપસી કરી લીધી છે. તેમના પરત આવતા પહેલા જ બુમરાહના ફેન્સ ખુશ જોવા મળ્યા. બુમરાહે પહેલી ઓવરમાં 2 વિકેટ લીધી અને કોઈપણ મુશ્કેલી વિના 4 ઓવર નાંખી. સૌથી ખાસ વાત એ રહી કે બુમરાહ મુશ્કેલી વિના ફિટનેસ સાથે રમતા જોવા મળ્યા. ટીમ ઈન્ડિયાને જીત મળી. ભારતીય ટીમ મેનેજમેન્ટ અને ફેન્સે બુમરાહના પરત આવવાને લઈને ખુશી વ્યક્ત કરી પણ શું તે હાર્દિક પંડ્યાની કિંમત પર હશે?
ટીમ ઈન્ડિયામાં વાપસી કરનાર બુમરાહને આયર્લેન્ડ સામે માત્ર વાપસીની તક જ નથી આપવામાં આવી, પરંતુ તેને કેપ્ટનશિપ પણ સોંપવામાં આવી હતી. તેનું મુખ્ય કારણ બુમરાહની ઈચ્છા હોવાનું માનવામાં આવતું હતું. શરૂઆતના અહેવાલોમાં એવું કહેવામાં આવ્યું હતું કે બુમરાહ પોતે કેપ્ટનશીપમાં રસ ધરાવતો હતો, જેના કારણે તેને આ જવાબદારી સોંપવામાં આવી હતી, નહીં તો ઋતુરાજ ગાયકવાડને કેપ્ટન બનાવવાનો હતો, જેથી તે એશિયન ગેમ્સ માટે પોતાને ઢાળી શકે.
શું બુમરાહ બનશે નવો વાઇસ કેપ્ટન?
આ પાછળની બીજી કહાની હવે સ્પષ્ટ થઈ રહી છે અને આ જવાબદારી બુમરાહને મળશે. એક અહેવાલમાં બીસીસીઆઈના સૂત્રોને ટાંકીને દાવો કર્યો છે કે ટીમ ઈન્ડિયામાં ODI વાઇસ કેપ્ટનશિપ માટે હવે બુમરાહ અને હાર્દિક પંડ્યા વચ્ચે લડાઈ છે અને બુમરાહ જીતી શકે છે. રિપોર્ટમાં દાવો કરવામાં આવ્યો છે કે બુમરાહને એશિયા કપ અને વર્લ્ડ કપમાં રોહિત શર્માની જગ્યાએ વાઈસ કેપ્ટન બનાવવામાં આવી શકે છે. તેનું મુખ્ય કારણ બુમરાહનું નેતૃત્વની ભૂમિકામાં વરિષ્ઠ હોવાનું કહેવાય છે. હકીકતમાં, બુમરાહ 2022 માં દક્ષિણ આફ્રિકાના પ્રવાસ પર ODI શ્રેણીમાં ટીમ ઈન્ડિયાનો વાઇસ કેપ્ટન પણ હતો. આ પછી જુલાઈ 2022માં તેણે ઈંગ્લેન્ડ સામેની ટેસ્ટ મેચમાં પણ ટીમની કમાન સંભાળી હતી. આવી સ્થિતિમાં તેને એશિયા કપમાં આ તક મળી શકે છે. હાલમાં હાર્દિક પંડ્યા ટીમનો વાઇસ કેપ્ટન છે.
હાર્દિક માટે ખતરાની ઘંટડી!
જો આમ થશે તો વનડેમાં હાર્દિક પંડ્યા પાસેથી આ જવાબદારી છીનવાઈ જશે અને પછી વર્લ્ડ કપ બાદ નેતૃત્વમાં પરિવર્તનની સ્થિતિમાં રોહિત બાદ માત્ર બુમરાહને જ ODIની કેપ્ટનશીપ મળશે. હાર્દિક હાલમાં ટી20 ટીમનો કેપ્ટન છે, જ્યાં તેની શરૂઆત સારી રહી હતી. જો કે, નબળા વેસ્ટ ઈન્ડિઝ સામેની ટી20 શ્રેણીમાં મળેલી હારમાં તેની કેપ્ટનશીપ પણ પ્રશ્નના ઘેરામાં આવી હતી, જેમાં કેટલાક નિર્ણયોએ બધાને ચોંકાવી દીધા હતા.
