- ઓસ્ટ્રેલિયાની ટીમ આવતા મહિને સ્કોટલેન્ડના પ્રવાસે જઈ રહી છે
- 4 સપ્ટેમ્બરથી સ્કોટલેન્ડ સામે ત્રણ મેચની T20 સિરીઝ રમવાની છે
- જોશ હેઝલવુડ ઈજાને કારણે આ સિરીઝમાંથી બહાર થઈ ગયો છે
ઓસ્ટ્રેલિયાની ટીમ આવતા મહિને સ્કોટલેન્ડના પ્રવાસે જઈ રહી છે. ઓસ્ટ્રેલિયાએ 4 સપ્ટેમ્બરથી સ્કોટલેન્ડ સામે ત્રણ મેચની T20 સિરીઝ રમવાની છે. આ પ્રવાસ પહેલા ઓસ્ટ્રેલિયાની ટીમને મોટો ઝટકો લાગ્યો છે. ટીમના સ્ટાર ખેલાડી જોશ હેઝલવુડ ઈજાને કારણે આ સિરીઝમાંથી બહાર થઈ ગયો છે. તેને ગયા અઠવાડિયે ટ્રેનિંગ દરમિયાન આ ઈજા થઈ હતી. ક્રિકેટ ઓસ્ટ્રેલિયાએ પણ તેના સ્થાનની જાહેરાત કરી છે.
રિલે મેરેડિથને તક મળી
જોશ હેઝલવુડ સ્કોટલેન્ડ સામેની ત્રણ મેચની T20 સિરીઝમાંથી બહાર થયા બાદ તેના સ્થાને રિલે મેરેડિથને ટીમમાં સામેલ કરવામાં આવ્યો છે. મેરેડિથે ઓસ્ટ્રેલિયા માટે અત્યાર સુધી માત્ર 5 T20 મેચ રમી છે. તેણે તેની છેલ્લી T20 મેચ ઓસ્ટ્રેલિયા માટે 2021માં રમી હતી. ક્રિકેટ ઓસ્ટ્રેલિયાએ જોકે આશા વ્યક્ત કરી છે કે હેઝલવુડ ઈંગ્લેન્ડ સામે T20 અને વનડેમાં વાપસી કરી શકે છે. ક્રિકેટ ઓસ્ટ્રેલિયા જોશ હેઝલવુડની ઈજાને લઈને ખૂબ જ ગંભીર છે કારણ કે તેણે આ વર્ષના અંતમાં ભારત સામે ઘરઆંગણે 5 મેચની ટેસ્ટ સિરીઝ પણ રમવાની છે.
સ્પેન્સર જોનસન પણ આ સીરીઝનો ભાગ નહીં હોય
જોશ હેઝલવુડ સ્કોટલેન્ડ સામેની સિરીઝમાંથી બહાર થનાર બીજો બોલર છે. તેના પહેલા સ્પેન્સર જોનસન પણ ઈજાના કારણે આ સિરીઝમાંથી બહાર છે. ધ હન્ડ્રેડ ટુર્નામેન્ટ દરમિયાન તેને આ ઈજા થઈ હતી. આ સિરીઝમાં હવે રિલે મેરેડિથ, ઝેવિયર બાર્ટલેટ, સીન એબોટ અને નાથન એલિસને ફાસ્ટ બોલિંગની જવાબદારી સંભાળવી પડશે.
સ્કોટલેન્ડ સામે T20 સિરીઝ માટે ઓસ્ટ્રેલિયાની ટીમ
મિચેલ માર્શ (કેપ્ટન), સીન એબોટ, ઝેવિયર બાર્ટલેટ, કૂપર કોનોલી, ટિમ ડેવિડ, નાથન એલિસ, જેક ફ્રેઝર-મેકગર્ક, કેમેરોન ગ્રીન, એરોન હાર્ડી, ટ્રેવિસ હેડ, જોશ ઈંગ્લિસ (WK), રિલે મેરેડિથ, માર્કસ સ્ટોઈનિસ, એડમ ઝમ્પા.
