- બાંગ્લાદેશના વિકેટકીપર બેટ્સમેન મુશફિકુર રહીમે ઈતિહાસ રચ્યો
- વિદેશી ધરતી પર ટેસ્ટ ફોર્મેટમાં સૌથી વધુ સદી ફટકારનાર પ્રથમ બેટ્સમેન
- મુશ્ફિકુર રહીમે રાવલપિંડી ક્રિકેટ સ્ટેડિયમમાં શાનદાર બેટિંગ કરી
બાંગ્લાદેશ ક્રિકેટ ટીમના અનુભવી વિકેટકીપર બેટ્સમેન મુશફિકુર રહીમે ઈતિહાસ રચ્યો છે. પોતાની ટીમ વતી તે વિદેશી ધરતી પર ટેસ્ટ ફોર્મેટમાં સૌથી વધુ સદી ફટકારનાર પ્રથમ બેટ્સમેન બની ગયો છે. તેના પહેલા આ ખાસ રેકોર્ડ તમીમ ઈકબાલના નામે હતો, પરંતુ રહીમે હવે રાવલપિંડી ટેસ્ટની પ્રથમ ઈનિંગમાં સદી ફટકારીને આ ખાસ સિદ્ધિ પોતાના નામે કરી લીધી છે. તેના નામે હવે બાંગ્લાદેશ માટે વિદેશી ધરતી પર ટેસ્ટ ફોર્મેટમાં સૌથી વધુ 5 સદી ફટકારવાનો રેકોર્ડ નોંધાઈ ગયો છે.
તમીમ ઈકબાલનો તોડ્યો રેકોર્ડ
મુશ્ફિકુર રહીમે બાંગ્લાદેશ માટે ટેસ્ટ ક્રિકેટમાં સૌથી વધુ સદી ફટકારવાના મામલે પણ તમીમ ઈકબાલને પાછળ છોડી દીધો છે. ઈકબાલે 2008 થી 2023 વચ્ચે તેની ટીમ માટે કુલ 70 ટેસ્ટ મેચોમાં ભાગ લીધો હતો. આ દરમિયાન તે 134 ઇનિંગ્સમાં 10 સદી ફટકારવામાં સફળ રહ્યો હતો. રાવલપિંડી ટેસ્ટમાં પોતાની 11મી સદી પૂરી કરતા રહીમે હવે એક ખાસ બાબતમાં ઈકબાલને પાછળ છોડી દીધો છે.
બાંગ્લાદેશ માટે ટેસ્ટ ક્રિકેટમાં સૌથી વધુ સદી ફટકારવાનો વિશેષ રેકોર્ડ વર્તમાન બેટ્સમેન મોમિનુલ હકના નામે છે. હકે 2013 થી બાંગ્લાદેશ ક્રિકેટ ટીમ માટે 62* મેચ રમી છે અને 115 ઇનિંગ્સમાં સૌથી વધુ 12 સદી ફટકારી છે.
રહીમ 15000 રન બનાવનારો બીજો બેટ્સમેન બન્યો
મુશ્ફિકુર રહીમે ચાલુ મેચમાં વધુ એક ખાસ સિદ્ધિ મેળવી છે. તે બાંગ્લાદેશ ક્રિકેટ ટીમ માટે આંતરરાષ્ટ્રીય ક્રિકેટમાં સૌથી વધુ રન બનાવનાર બીજો બેટ્સમેન બની ગયો છે. 37 વર્ષીય બેટ્સમેને 2005 થી આંતરરાષ્ટ્રીય ક્રિકેટમાં બાંગ્લાદેશ માટે કુલ 462* મેચ રમી છે. આ દરમિયાન તેના બેટથી 510 ઇનિંગ્સમાં 34.56ની એવરેજથી 15107 રન બનાવ્યા છે.
બાંગ્લાદેશ માટે આંતરરાષ્ટ્રીય સ્તરે સૌથી વધુ રન બનાવવાની સિદ્ધિ તમીમ ઈકબાલના નામે છે. આ અનુભવી બેટ્સમેને 2007 થી 2023 વચ્ચે કુલ 387 મેચોમાં ભાગ લીધો હતો. આ દરમિયાન, તે 448 ઇનિંગ્સમાં 35.41ની એવરેજથી 15192 રન બનાવવામાં સફળ રહ્યો.
મુશ્ફિકુર રહીમે તેની ટેસ્ટ કારકિર્દીની 11મી સદી ફટકારી
મુશ્ફિકુર રહીમે રાવલપિંડી ક્રિકેટ સ્ટેડિયમમાં શાનદાર બેટિંગ કરતા તેની ટેસ્ટ ક્રિકેટ કારકિર્દીની 11મી સદી પૂરી કરી છે. હાલમાં તે પોતાની ટીમ માટે 52.66ના સ્ટ્રાઈક રેટથી 281 બોલમાં 148 રન બનાવીને મેદાનમાં છે. આ દરમિયાન તેના બેટમાંથી 18 શાનદાર ચોગ્ગા આવ્યા છે.
રોહિત-કોહલી નથી કરી શક્યાં આ કારનામું
ખાસ વાત એ છે કે તેણે કંઈક એવું અદ્ભુત કર્યું જે વિરાટ કોહલી અને રોહિત શર્મા જેવા મહાન ભારતીય બેટ્સમેનોને પણ આજ સુધી કરવાની તક મળી નથી. પાકિસ્તાનમાં મુશ્ફિકુરની આ પ્રથમ ટેસ્ટ મેચ છે અને તેણે આ સદી તેની પહેલી જ ઇનિંગમાં ફટકારી છે, જ્યારે વિરાટ અને રોહિત સહિતના વર્તમાન ભારતીય બેટ્સમેનોને પાકિસ્તાન સામે ટેસ્ટ મેચ રમવાની તક પણ મળી નથી.
