કુલદીપ યાદવે યોગી આદિત્યનાથ સાથે કરી શુભેચ્છા મુલાકાત, CMએ આપી ખાસ ભેટ

• T20 વર્લ્ડકપ 2024માં ટીમ ઈન્ડિયા બની ચેમ્પિયન
  
• ​​કુલદીપ યાદવે CM યોગી આદિત્યનાથ સાથે મુલાકાત કરી
• CMએ કુલદીપ યાદવને ચાંદીનો સિક્કો ભેટમાં આપ્યો

T20 વર્લ્ડકપ જીતીને ટીમ ઈન્ડિયાના ખેલાડીઓ પોતપોતાના ઘરે પહોંચી ગયા છે. જ્યાં તેમનું ભવ્ય સ્વાગત કરવામાં આવી રહ્યું છે. સ્ટાર સ્પિનર ​​કુલદીપ યાદવ પણ કાનપુર સ્થિત તેના ઘરે પહોંચ્યો હતો. આ પછી તે સોમવારે એક ખાસ વ્યક્તિને મળ્યો હતો. કુલદીપે ઉત્તર પ્રદેશના મુખ્યમંત્રી યોગી આદિત્યનાથ સાથે શુભેચ્છા મુલાકાત કરી હતી.

CMએ ખાસ ભેટ આપી હતી

CMએ કુલદીપ યાદવને ખાસ ભેટ આપી. જેમાં ઉત્તર પ્રદેશ સરકાર દ્વારા બનાવવામાં આવેલ ખાસ ચાંદીનો સિક્કો હતો. આ સિક્કો શુભેચ્છા મુલાકાત બાદ સંભારણા તરીકે આપવામાં આવે છે. કુલદીપ યાદવનો જન્મ ઉત્તર પ્રદેશના કાનપુરમાં થયો હતો. તેણે ત્યાં ડોમેસ્ટિક ક્રિકેટ રમતા ઘણા રેકોર્ડ બનાવ્યા. 29 વર્ષીય સ્ટાર બોલર કુલદીપ યાદવે ઓસ્ટ્રેલિયા સામે માર્ચ 2017માં ટીમ ઈન્ડિયા માટે ટેસ્ટ ડેબ્યૂ કર્યું હતું. આ પછી, તેણે જૂન 2017માં વેસ્ટ ઈન્ડિઝ વિરુદ્ધ વન-ડે અને જુલાઈમાં વેસ્ટ ઈન્ડિઝ વિરુદ્ધ T20 ડેબ્યૂ કર્યું હતું.

કુલદીપ યાદવ ગ્રુપ સ્ટેજ બાદ જોડાયો હતો

T20 વર્લ્ડકપમાં ગ્રૂપ સ્ટેજ બાદ જ કુલદીપ યાદવ ટીમ ઈન્ડિયાના પ્લેઈંગ ઈલેવનમાં સામેલ થયો હતો. તે પ્રથમ વખત સુપર-8માં અફઘાનિસ્તાન સામે રમ્યો હતો. જ્યાં તેણે 2 વિકેટ લઈને પોતાની પ્રતિભા પુરવાર કરી હતી. ત્યારબાદ બાંગ્લાદેશ સામે 3, ઓસ્ટ્રેલિયા સામે 2 અને ઈંગ્લેન્ડ સામે 3 વિકેટ લીધી હતી. જો કે તે ફાઇનલમાં એક પણ વિકેટ લઈ શક્યો ન હતો, પરંતુ તેણે ટૂર્નામેન્ટમાં શાનદાર પ્રદર્શન કર્યું હતું. કુલદીપે અત્યાર સુધી 12 ટેસ્ટ મેચમાં 53 વિકેટ, 103 વનડેમાં 168 વિકેટ અને 40 T20 આંતરરાષ્ટ્રીય મેચમાં 69 વિકેટ ઝડપી છે.