- ઈંગ્લેન્ડ સામેની પ્રથમ ટેસ્ટમાં ભારતની 28 રનથી હાર
- 190 રનની જંગી લીડ લેવા છતાં ભારતીય ટીમની હાર
- માઈકલ વોને રોહિતની કેપ્ટનશિપ પર સાંધ્યું નિશાન
હૈદરાબાદ ટેસ્ટ મેચમાં 190 રનની જંગી લીડ લેવા છતાં ભારતને 28 રનથી હારનો સામનો કરવો પડ્યો હતો. 91 વર્ષમાં પહેલીવાર એવું બન્યું કે ભારત 190 રનની મોટી લીડ લીધા પછી પણ હારી ગયું. જે બાદ ઈંગ્લેન્ડના પૂર્વ કેપ્ટન માઈકલ વોને રોહિત શર્માની કેપ્ટનશિપ પર સવાલ ઉઠાવ્યા હતા. વોને કહ્યું કે જો હૈદરાબાદ ટેસ્ટમાં રોહિતની જગ્યાએ વિરાટ કોહલી ટીમનો કેપ્ટન હોત તો ભારત ક્યારેય હાર્યું ન હોત.
રોહિત એવરેજ કેપ્ટનશિપ કરી
હૈદરાબાદની પ્રથમ ટેસ્ટ મેચમાં ભારતે પ્રથમ દાવમાં ઈંગ્લેન્ડ પર હાવી રહ્યું હતું. પરંતુ બીજા દાવમાં ભારત નિષ્ફળ રહ્યું હતું. પ્રથમ દાવમાં 190 રનની લીડ લેવા છતાં ભારતીય બોલરોએ ઈંગ્લેન્ડ પર દબાણ બનાવવાને બદલે એવરેજ બોલિંગ કરી, જ્યારે બેટિંગ દરમિયાન ભારતીય બેટ્સમેનો 231 રનના લક્ષ્યનો પીછો પણ કરી શક્યા ન હતા.
આના પર ઈંગ્લેન્ડના પૂર્વ કેપ્ટન માઈકલ વોને સવાલ ઉઠાવતા કહ્યું કે, "ટીમ ઈન્ડિયા હૈદરાબાદ ટેસ્ટમાં વિરાટ કોહલીની કેપ્ટનશિપને ઘણી મિસ કરી હતી. જો વિરાટ હૈદરાબાદ ટેસ્ટમાં ટીમનો કેપ્ટન હોત તો ભારત ચોક્કસપણે હાર્યું ન હોત." તેણે રોહિત માટે કહ્યું, "હું માનું છું કે રોહિત એક શાનદાર કેપ્ટન છે, પરંતુ તેમ છતાં તે પ્રથમ ટેસ્ટમાં એટલો અસરકારક દેખાતો નહોતો."
રોહિતની કેપ્ટનશિપ પર નિશાન સાંધ્યું
આ પહેલીવાર નથી જ્યારે માઈકલ વોને રોહિત શર્માની કેપ્ટનશિપની આકરી ટીકા કરી હોય. પ્રથમ ટેસ્ટમાં હાર બાદ વોને કહ્યું હતું કે, “રોહિત પાસે ઓલી પોપના શોટ્સનો કોઈ જવાબ નહોતો. જ્યારે ઓલી પોપ સ્વીપ અને રિવર્સ સ્વીપ રમીને રન બનાવી રહ્યો હતો ત્યારે રોહિત પાસે તેને રોકવાની કોઈ વ્યૂહરચના નહોતી.” તમને જણાવી દઈએ કે ઓલી પોપે પ્રથમ ટેસ્ટની બીજી ઇનિંગમાં શાનદાર ઇનિંગ રમી હતી. પોપે હૈદરાબાદ ટેસ્ટમાં 196 રનની યાદગાર ઇનિંગ રમી હતી. બીજી ઈનિંગમાં ઈંગ્લેન્ડે 156 રન પર 5 વિકેટ ગુમાવી દીધી હતી ત્યારે પોપે ઈંગ્લેન્ડને 420 રન સુધી પહોંચાડ્યું હતું.
બીજી ટેસ્ટ વિશાખાપટ્ટનમમાં યોજાશે
હૈદરાબાદ બાદ ભારત અને ઈંગ્લેન્ડ વચ્ચે બીજી ટેસ્ટ મેચ વિશાખાપટ્ટનમમાં રમાશે. ભારતે અત્યાર સુધી અહીં માત્ર બે ટેસ્ટ મેચ રમી છે. જેમાંથી બંને મેચ જીતી છે. ભારત અને ઈંગ્લેન્ડ વચ્ચે 2016માં અહીં પ્રથમ ટેસ્ટ રમાઈ હતી. જેમાં ભારતે ઈંગ્લેન્ડને 246 રનથી હરાવ્યું હતું.
