- ન્યૂઝીલેન્ડની ટીમ ટૂંક સમયમાં ભારતનો પ્રવાસ કરવાની છે
- ભારતમાં ન્યૂઝીલેન્ડ અને અફઘાનિસ્તાન વચ્ચે રમાશે ટેસ્ટ મેચ
- ન્યૂઝીલેન્ડ ટીમ શ્રીલંકા સાથે 2 મેચની ટેસ્ટ સિરીઝ રમશે
ન્યૂઝીલેન્ડની ટીમ ટૂંક સમયમાં ભારતનો પ્રવાસ કરવાની છે, પરંતુ અહીં તેનો સામનો અફઘાનિસ્તાન સાથે થશે. વાસ્તવમાં ભારતમાં ન્યુઝીલેન્ડ અને અફઘાનિસ્તાન વચ્ચે ટેસ્ટ મેચ રમાશે. જે બાદ ન્યુઝીલેન્ડનો મુકાબલો શ્રીલંકા સાથે થશે. કિવી ટીમ શ્રીલંકા સાથે 2 મેચની ટેસ્ટ સિરીઝ રમશે. જેને લઈને આજે ન્યુઝીલેન્ડ ક્રિકેટે 15 સભ્યોની ટેસ્ટ ટીમની જાહેરાત કરી છે. વર્લ્ડ ટેસ્ટ ચેમ્પિયનશિપ ફાઈનલના દૃષ્ટિકોણથી ન્યૂઝીલેન્ડ માટે આ બંને ટેસ્ટ સિરીઝ ખૂબ જ મહત્વપૂર્ણ છે.
આ 2 ખેલાડીઓએ ટીમમાં કરી એન્ટ્રી
અફઘાનિસ્તાન અને શ્રીલંકા સાથે રમાનારી ટેસ્ટ મેચ માટે ટીમમાં બે ફાસ્ટ બોલર વિલિયમ ઓ'રોર્કે અને બેન સીઅર્સની જોડીનો સમાવેશ કરવામાં આવ્યો છે. પોતાના ટેસ્ટ ડેબ્યૂમાં 23 વર્ષીય ઓ'રોર્કે પોતાનું સર્વશ્રેષ્ઠ પ્રદર્શન આપ્યું હતું. જેમાં તેણે 93 રન આપીને 9 વિકેટ ઝડપી હતી. આ પછી, તેને ઓસ્ટ્રેલિયા સાથે રમાયેલી ટેસ્ટ સિરીઝ માટે ટીમમાં સામેલ કરવામાં આવ્યો હતો.
ઓ'રોર્કે આ સિરીઝની માત્ર પ્રથમ મેચ જ રમી શક્યો હતો, ત્યારબાદ તેને પીઠની ઈજાને કારણે બહાર થવું પડ્યું હતું. ઓ'રોર્કે આઉટ થયા બાદ બેન સીઅર્સને ઓસ્ટ્રેલિયા સામે કિવી ટીમમાં તક મળી હતી. બેન સીઅર્સએ બીજી મેચમાં શાનદાર બોલિંગ કરી અને 5 વિકેટ લીધી.
ઓ'રોર્કે અને બેનને ટીમમાં સામેલ કરીને કોચ ખુશ છે
ટીમની જાહેરાત કર્યા પછી, ન્યુઝીલેન્ડના હેડ કોચ ગેરી સ્ટેડે કહ્યું: "જ્યારે યુવા ખેલાડીઓ તેમના પ્રદર્શનથી આગળ વધે છે ત્યારે તે હંમેશા સારું છે અને હું જાણું છું કે વિલ અને બેન ખરેખર ટેસ્ટ ક્રિકેટના પડકારોની રાહ જોઈ રહ્યા છે. માઇકલને તેની ઇજાઓમાંથી બહાર આવવા અને ત્રણેય ફોર્મેટમાં કિવી ટીમમાં વાપસી કરવા માટે સખત મહેનત કરવી પડી છે. હવે અમે ભારત અને શ્રીલંકામાં ટર્નિંગ વિકેટની અપેક્ષા રાખીએ છીએ.
