Manu Bhaker ફરી એકવાર મચાવી ધૂમ, એશિયન શૂટિંગ ચેમ્પિયનશિપમાં જીત્યો બ્રોન્ઝ મેડલ

ભારતની સ્ટાર મહિલા શૂટર મનુ ભાકરે 19 ઓગસ્ટના રોજ કઝાકિસ્તાનના શ્યામકેન્ટમાં એશિયન શૂટિંગ ચેમ્પિયનશિપ 2025માં મહિલાઓની 10 મીટર એર પિસ્તોલ ઈવેન્ટમાં બ્રોન્ઝ મેડલ જીત્યો હતો.

ભારતની મનુ ભાકરે ફાઈનલમાં 219.7 પોઈન્ટ મેળવ્યા હતા. તેના સિવાય સાઉથ કોરિયાની જિન યાંગ (241.6) એ સિલ્વર મેડલ અને ચીનની કિયાનકે મા (243.2) એ ગોલ્ડ મેડલ જીત્યો હતો. જિન યાંગે 241.6 પોઈન્ટ મેળવ્યા હતા. કિયાનકે માએ 243.2 પોઈન્ટ મેળવ્યા હતા.

આ પહેલા ભારતે ટીમ ઈવેન્ટમાં પણ બ્રોન્ઝ મેડલ જીત્યો હતો. મનુ ભાકર, સુરુચી સિંહ અને પલક ગુલિયાની ટીમે એર શૂટિંગમાં 1730 પોઈન્ટ બનાવ્યા હતા અને તે બીજા ક્રમે રહેલા રિપબ્લિક ઓફ કોરિયા (1731) થી એક પોઈન્ટ પાછળ અને ગોલ્ડ મેડલ વિજેતા ચીન (1740) થી 10 પોઈન્ટ પાછળ હતી.

મનુ ભાકર 583 પોઈન્ટ સાથે ફાઈનલમાં પહોંચી

તમને જણાવી દઈએ કે અગાઉ મનુએ 583 પોઈન્ટ મેળવીને ફાઈનલ રાઉન્ડ માટે ક્વોલિફાય કર્યું હતું, જેના કારણે તે બીજા સ્થાને રહી હતી, જ્યારે ચીનની કિઆનક્સુન યાઓ 584 પોઈન્ટ સાથે પોઈન્ટ ટેબલમાં ટોપ પર હતી. સુરુચી અને પલક ફાઈનલમાં સ્થાન મેળવી શકી ન હતી.

ફાઈનલમાં મનુ ભાકરની શરૂઆત રહી ધીમી

ફાઈનલમાં મનુ ભાકરની શરૂઆત ખૂબ જ ધીમી રહી. પહેલા પાંચ શોટ પછી તે પાંચમા સ્થાને હતી, પરંતુ પછીથી તેણે શાનદાર કમબેક કર્યું અને લીડ મેળવી. 11મા શોટમાં તેણે 10.5નો સ્કોર કર્યો અને આ સાથે તે બીજા સ્થાને પહોંચી. પરંતુ પછી 17મા શોટમાં, 9.7ના સ્કોર સાથે મનુ ભાકર બહાર થવાની કગાર પર હતી. પરંતુ મનુએ પોતાની ધીરજ જાળવી રાખી અને આખરે બ્રોન્ઝ મેડલ જીતવામાં સફળ રહી.