શ્રીલંકા અને બાંગ્લાદેશમાંથી આજે એકનું એશિયા કપમાંથી બહાર થવું નિશ્ચિત

• ગ્રૂપનો અંતિમ મુકાબલો શ્રીલંકા અને બાંગ્લાદેશ વચ્ચે થશે
  
• વિજય મેળવનાર ટીમ સુપર-4માં પ્રવેશ કરશે
• હારનાર ટીમ એશિયા કપમાંથી બહાર થશે

એશિયા કપની શરૂઆત અપસેટ સાથે થઈ છે અને ગ્રૂપ-બીમાં અફઘાનિસ્તાનની ટીમ શ્રીલંકા અને બાંગ્લાદેશ બંનેને હરાવીને સુપર-4 તબક્કામાં પ્રવેશી ચૂકી છે. હવે ગ્રૂપના અંતિમ મુકાબલો ગુરુવારે શ્રીલંકા અને બાંગ્લાદેશ વચ્ચે થશે અને આ મેચ જીતનાર ટીમ બીજા રાઉન્ડમાં પહોંચી જશે. હારનાર ટીમ એશિયા કપમાંથી બહાર થશે. ટૂર્નામેન્ટના ઇતિહાસમાં શ્રીલંકન ટીમ સફળ છે અને તે પાંચ વખત ટાઇટલ જીતી ચૂકી છે. બાંગ્લાદેશ હજુ સુધી એક પણ વખત ચેમ્પિયન બન્યું નથી.

અફઘાનિસ્તાન સામે શ્રીલંકા નિષ્ફળ

અફઘાનિસ્તાન સામે શ્રીલંકન ટીમ નિષ્ફળ રહી હતી અને તેણે 60 રનમાં પાંચ વિકેટ ગુમાવી દીધી હતી. ભાનુકાએ 38 તથા કરુણારત્નેએ 31 રન બનાવીને ટીમને 100ના સ્કોર સુધી પહોંચાડી હતી. પૂરી ટીમ 19.4 ઓવરમાં 105 રનના સ્કોરે ઓલઆઉટ થઈ ગઈ હતી. અફઘાન ટીમે 10.1 ઓવરમાં બે વિકેટે ટાર્ગેટ હાંસલ કરી લીધો હતો. બાંગ્લાદેશની ટીમે પણ અફઘાનિસ્તાન સામે સંઘર્ષ કર્યો હતો અને સાત વિકેટે 127 રન બનાવી શકી હતી. મોસાડેક હુસૈને અણનમ 48 રન બનાવીને ટીમની સ્થિતિ સુધારી હતી. બંને ટીમના બોલર્સ ફોર્મમાં જણાતા હોવાના કારણે બાંગ્લાદેશ અને શ્રીલંકાનો મુકાબલો રોમાંચક બને તેવી પૂરી સંભાવના છે.