- ગિલ-જયસ્વાલની T20માં આક્રમક બેટિંગ
- ભારતની જીતમાં મહત્વની ભૂમિકા ભજવી
- પ્રથમ વિકેટ માટે રેકોર્ડ 165 રન બનાવ્યા
ફ્લોરિડામાં રમાયેલી પાંચ T20 સીરિઝની ચોથી મેચમાં ભારતે વેસ્ટ ઈન્ડિઝને 9 વિકેટે હરાવીને સીરિઝ 2-2થી બરાબર કરી લીધી છે. ટીમ ઈન્ડિયા એક સમયે સીરિઝમાં 0-2થી પાછળ હતી પરંતુ સતત બે મેચ જીતીને સમાનતા હાંસલ કરી હતી. શુભમન ગિલ અને યશસ્વી જયસ્વાલની જોડીએ ચોથી T20માં ભારતની જીતમાં મહત્વની ભૂમિકા ભજવી હતી. બંનેએ પ્રથમ વિકેટ માટે રેકોર્ડ 165 રન બનાવ્યા હતા. આ જોડીએ સચિન-સૌરવની યાદ અપાવી દીધી.
સળંગ બે મેચ હારી અને પછી એટલી જ મેચ જીતીને સીરિઝ બરાબરી કરી. યુવા ખેલાડીઓથી સજ્જ ટીમ ઈન્ડિયાએ વેસ્ટ ઈન્ડિઝ સામેની પાંચ ટી-20 સીરિઝમાં પાછળ રહીને જોરદાર વાપસી કરી છે. ફ્લોરિડામાં રમાયેલી ચોથી T20માં ભારતે કેરેબિયન ટીમને એકતરફી હાર આપી હતી. 179 રનનો ટાર્ગેટ 18 બોલ બાકી રહેતા માત્ર 1 વિકેટના નુકસાને હાંસલ કરી લીધો હતો.
રોહિત-રાહુલની બરાબરી કરી
ભારતની જીતમાં બે યુવા ખેલાડીઓ શુભમન ગિલ અને યશસ્વી જયસ્વાલની જોડી ચમકી હતી. 179 રનના લક્ષ્યનો પીછો કરતી વખતે ગિલ-યશસ્વીએ 15.3 ઓવરમાં 165 રન ઉમેર્યા હતા. ભારત માટે T20માં પ્રથમ વિકેટ માટે આ સંયુક્ત સૌથી મોટી ભાગીદારી છે. આ જોડીએ રોહિત શર્મા અને કેએલ રાહુલની બરાબરી કરી હતી. રોહિત-રાહુલની ઓપનિંગ જોડીએ ડિસેમ્બર 2017માં ઇન્દોરમાં શ્રીલંકા સામે ઓપનિંગ વિકેટ માટે 165 રન બનાવ્યા હતા.
ફ્લોરિડામાં ચોગ્ગા-છગ્ગાનો વરસાદ કર્યો
યશસ્વી જયસ્વાલ અને શુભમન ગિલે વેસ્ટ ઈન્ડિઝના બોલરોને જોરદાર રીતે પછાડ્યા હતા. આ બંનેની બેટિંગ જોઈને લાગ્યું કે એક શેર તો બીજો સવાશેર. બંનેએ આખી ઈનિંગ દરમિયાન વેસ્ટ ઈન્ડિઝના બોલરોને શ્વાસ લેવાની તક પણ આપી ન હતી. માત્ર પાવરપ્લેમાં જ નહીં પરંતુ તે પછી પણ ખુલ્લેઆમ ચોગ્ગા-છગ્ગાનો વરસાદ કર્યો હતો. બંનેએ જે રીતે નીડર બેટિંગ કરી તે જોઈને સચિન તેંડુલકર અને સૌરવ ગાંગુલીની જોડી યાદ આવી ગઈ.
સચિન-સૌરવની જોડી 2001માં કેન્યામાં શાનદાર રહી હતી
સચિન-સૌરવ પણ આવી જ નિર્ભય રીતે બેટિંગ કરતા હતા. વનડેમાં આ જોડીએ ભારત માટે ઓપનિંગ વિકેટ માટે સૌથી મોટી ભાગીદારી કરી હતી. સચિન-સૌરવે 2001માં કેન્યા સામે ઓપનિંગ વિકેટ માટે 258 રન બનાવ્યા હતા. આ રેકોર્ડ હજુ પણ અકબંધ છે. આ સિવાય બંનેએ વન-ડેમાં ફરી એકવાર પ્રથમ વિકેટ માટે 250 પ્લસ રનની ભાગીદારી કરી છે. બંનેએ 1998માં શ્રીલંકા સામે 252 રન જોડ્યા હતા.
ODI ઈતિહાસમાં સૌથી હિટ જોડી
સચિન-સૌરવ ODI ઈતિહાસમાં સૌથી હિટ જોડી રહી છે. બંનેએ સૌથી વધુ 26 વખત સદીની ભાગીદારી કરી છે. આ પછી વિરાટ-રોહિત અને રોહિત-ધવને ભારત માટે વનડેમાં 18-18 વખત સદીની ભાગીદારી કરી. વેસ્ટ ઈન્ડિઝ સામેની ચોથી T20માં શુભમન ગિલ અને યશસ્વી જયસ્વાલે જે રીતે બેટિંગ કરી તે જોઈને લાગે છે કે ભારતને મર્યાદિત ઓવરના ક્રિકેટમાં ભાવિ સચિન-સૌરવની ઓપનિંગ જોડી મળી ગઈ છે.
ગિલ-જયસ્વાલની જોડી છવાયી
ટાર્ગેટનો પીછો કરતા યશસ્વી અને શુભમનની જોડીએ આક્રમક બેટિંગ કરી હતી અને પાવરપ્લેમાં એકપણ વિકેટ ગુમાવ્યા વિના 66 રન બનાવ્યા હતા. વેસ્ટ ઈન્ડિઝ સામે પાવરપ્લેમાં ભારતનો આ ત્રીજો સર્વશ્રેષ્ઠ સ્કોર છે. આ ધમાકેદાર શરૂઆતે ટીમ ઈન્ડિયાની જીતનો પાયો નાખ્યો હતો. 11મી ઓવરમાં, પ્રથમ શુભમન ગિલે 30 બોલમાં તેની અડધી સદી પૂરી કરી અને તે જ ઓવરમાં યશસ્વી જયસ્વાલે પણ 32 બોલમાં ચોગ્ગા સાથે તેની પહેલી ટી20 ફિફ્ટી પૂરી કરી. શુભમન ગિલ અને યશસ્વી જયસ્વાલે મળીને 14 ચોગ્ગા અને 8 છગ્ગા ફટકાર્યા હતા. એટલે કે આ જોડીએ માત્ર ચોગ્ગા અને છગ્ગા સાથે 104 રન પૂરા કર્યા. હવે જોવાનું એ રહેશે કે ગિલ-જયસ્વાલની જોડી આ ધમાકેદાર શરૂઆત જાળવી શકશે કે નહીં.
