પાકિસ્તાન ક્રિકેટ બોર્ડમાં ઉથલપાથલ, ટીમની હાર બાદ PCB ચીફે આપ્યું રાજીનામું

• ઝકા અશરફનું પીસીબીના અધ્યક્ષ પદેથી રાજીનામું
  
• 4 મહિના પહેલા સંભાળી હતી જવાબદારી
• મિકી આર્થર સહિત ત્રણેય કોચે આપ્યું રાજીનામું

પાકિસ્તાન ક્રિકેટ બોર્ડમાં આ દિવસોમાં કંઈ સારું નથી ચાલી રહ્યું. લગભગ 4 મહિના પહેલા પીસીબીના અધ્યક્ષ તરીકેની જવાબદારી સંભાળનાર ઝકા અશરફે પણ શુક્રવારે સાંજે રાજીનામું આપી દીધું છે. 19 જાન્યુઆરીની સાંજે સોશિયલ મીડિયા પર અચાનક તેમના રાજીનામાના સમાચાર ફેલાઈ ગયા હતા. આ પહેલા ગુરુવારે મિકી આર્થર સહિત એનસીએના ત્રણેય કોચે રાજીનામું આપી દીધું હતું. આ પહેલા પણ વર્લ્ડકપ બાદ મુખ્ય કોચ અને ડાયરેક્ટર મિકી આર્થરને તેમના પદ પરથી હટાવી દેવામાં આવ્યા હતા. જ્યારે ઈન્ઝમામ ઉલ હકે મુખ્ય પસંદગીકારનું પદ છોડી દીધું હતું.

એશિયા કપથી પાકિસ્તાનની ટીમમાં બધુ બરાબર નથી ચાલી રહ્યું. વર્લ્ડકપ દરમિયાન પણ ઘણી અરાજકતા જોવા મળી હતી. આ પછી રાજીનામાનો ફફડાટ વ્યાપી ગયો હતો. કેપ્ટન બાબર આઝમે પોતાનું પદ છોડી દીધું. મિકી આર્થરે ડિરેક્ટર પદ છોડી દીધું. ગુરુવારે જ એક સાથે ત્રણ રાજીનામા આવ્યા હતા. એશિયા કપ પહેલા જ નજમ સેઠીની જગ્યાએ ઝકા અશરફે આ પદ સંભાળ્યું હતું.

પીએમ સાથે સારા સંબંધો હતા

મળતી માહિતી મુજબ, ઝકા અશરફ પાકિસ્તાનના પૂર્વ વડાપ્રધાન શાહબાઝ શરીફના નજીકના માનવામાં આવતા હતા. પરંતુ હાલમાં પાકિસ્તાનના પીએમ અનવર ઉલ હક કક્કર છે. શાહબાઝે ઓક્ટોબરમાં રાજીનામું આપ્યું હતું. ઘણીવાર એવું કહેવામાં આવે છે કે પાકિસ્તાનમાં પીએમ બદલાતાની સાથે જ ત્યાંનું ક્રિકેટ બોર્ડ પણ બદલાઈ જાય છે. ઈમરાન ખાનના કાર્યકાળ દરમિયાન રમીઝ રાજા ચીફ હતા. એ પછી નજમ સેઠી આવ્યા, પછી ઝકા અશરફે જવાબદારી લીધી.

છેલ્લા એક વર્ષમાં ત્રણ PCB ચીફ બદલાયા છે. એક અહેવાલ અનુસાર, રાજીનામું આપ્યા બાદ ઝકા અશરફે કહ્યું, 'મેં હંમેશા પાકિસ્તાન ક્રિકેટના કલ્યાણને ધ્યાનમાં રાખીને કામ કર્યું છે. પરંતુ હવે મારા માટે આ રીતે કામ કરવું શક્ય નથી. હવે તે પીએમ કકર પર નિર્ભર કરશે કે તેઓ મારી જગ્યાએ કોને નોમિનેટ કરે છે.