'જો રૂટે તમારા પર બળાત્કાર...', લાઈવ વીડિયોમાં પાકિસ્તાની દિગ્ગજે કર્યો બફાટ

પાકિસ્તાનના ભૂતપૂર્વ ક્રિકેટર રાશિદ લતીફે તાજેતરમાં જ ઈંગ્લેન્ડ સામેની પ્રથમ ટેસ્ટ મેચમાં પાકિસ્તાનના ખરાબ પ્રદર્શનની ટીકા કરતા ખૂબ જ વિવાદાસ્પદ નિવેદન આપ્યું છે. ટેસ્ટ મેચોમાં પાકિસ્તાનની ટીમનું ખરાબ પ્રદર્શન ઇંગ્લિશ ટીમ સામે પણ ચાલુ રહ્યું અને મુલતાન ટેસ્ટમાં તેને ઇનિંગ્સ અને 47 રનથી શરમજનક હારનો સામનો કરવો પડ્યો. પ્રથમ બેટિંગ કરતા પાકિસ્તાને 556 રનનો મોટો સ્કોર બનાવ્યો હતો, પરંતુ તે પછી પણ ટીમ મેચ હારી ગઈ હતી. આ હાર બાદ લતીફે ટીમના ખરાબ પ્રદર્શનની આકરી ટીકા કરી હતી.

જો રૂટની ટેક્નિક ઘણી સારી

ટેસ્ટમાં ચોથા દિવસની રમત બાદ લતીફ વરિષ્ઠ પત્રકાર નૌમાન નિયાઝ સાથે વાત કરી રહ્યો હતો. આ દરમિયાન લતીફને ઈંગ્લેન્ડના બેટ્સમેન જો રૂટના ફિટનેસ લેવલ વિશે પૂછવામાં આવ્યું હતું. નિયાઝે કહ્યું કે રૂટ 258.1 ઓવર સુધી મેદાન પર રહ્યો અને થાક્યો પણ ન હતો, જ્યારે પાકિસ્તાનના ખેલાડીઓ સંપૂર્ણપણે થાકેલા દેખાતા હતા. આ અંગે લતીફે કહ્યું, 'જો રૂટ વિશે વાત કરીએ તો તે એક ઉત્તમ ઉદાહરણ છે. ટેકનિકલી તે એક ઉત્તમ ખેલાડી છે. તે ઈંગ્લેન્ડ માટે ટેસ્ટ મેચમાં સૌથી વધુ રન બનાવી ચૂક્યો છે. તેની ટેક્નિક ઘણી સારી છે.

અમારા ખેલાડીઓ હવામાં રમે છે - લતીફ

પાકિસ્તાની બેટ્સમેનોની ટેકનિકલ નબળાઈ દર્શાવતા તેણે કહ્યું, 'અમારા ખેલાડીઓ હવામાં રમે છે. અંગ્રેજી ખેલાડીઓ બોલ પિચ પર રમે છે. નોંધ કરો કે જ્યારે બોલ મિડલ સ્ટમ્પ પર હોય, ત્યારે જો રૂટ તેને સીધો રમે છે. જો બોલ ઈનસ્વિંગ થઈ રહ્યો હોય તો પણ તે સીધો રમવાનો પ્રયત્ન કરે છે. અમારા ખેલાડીઓ બોલ છોડતાની સાથે જ તેમના પગ આગળ વધે છે.' આગળ બોલતા લતીફે કહ્યું કે રૂટે પાકિસ્તાની ટીમ પર બળાત્કાર કર્યો છે, જેનાથી નિયાઝ સંપૂર્ણપણે ચોંકી ગયો હતો.

મેચની સ્થિતિ

પ્રથમ દાવમાં પાકિસ્તાનના 556 રનના જવાબમાં ઇંગ્લેન્ડે શાનદાર બેટિંગ કરી હતી અને તેનો પ્રથમ દાવ 823/7 પર ડિકલેર કર્યો હતો. હેરી બ્રુક અને જો રૂટે પાકિસ્તાનના બોલિંગ આક્રમણની ધોલાઈ કરી અને અનુક્રમે ત્રિપલ સદી અને બેવડી સદી ફટકારી. બ્રુકે 317 રન બનાવ્યા હતા જ્યારે રૂટે 262 રનની શાનદાર ઇનિંગ રમી હતી.